رووداو دیجیتاڵ
کۆمیسیۆنی یەکێتیی ئەوروپا راپۆرتێکی نوێی سەبارەت بە پەیوەندییەکانی لەگەڵ تورکیا ئامادە کردووە. لە راپۆرتەکەدا باسی ئەندامیێتیی تورکیا نەکراوە، بەڵام پێشنیاز بۆ دیالۆگ و هاوکاری و دەستپێکردنێکی نوێ لەگەڵ تورکیا کراوە.
جۆزێف بۆرێل، بەرپرسی سیاسەتی دەرەوەی یەکێتیی ئەوروپا و ئۆلیڤەر ڤارهێلی، ئەندامی کۆمیسیۆنی یەکێتی ئەوروپا و بەرپرس لە کاروباری دراوسێتی و فراوانبوون، راپۆرتێکیان نووسیوە و تێیدا داوای گفتوگۆی نوێیان لەگەڵ تورکیا کردووە.
بەگوێرەی راپۆرتەکە، داوا لە یەکێتی ئەوروپا دەکرێت لەسەر بنەمای "بەرژەوەندیی هاوبەش" لە بابەتەکانی کۆچ و وزە، بازرگانی و ڤیزا بۆ هاووڵاتیانی تورکیا هاوکار بێت.
لە راپۆرتەکەدا باسی ئاڵوگۆڕی بازرگانی لەگەڵ تورکیا کراوە و نووسراوە، "ئاستی بازرگانی لەگەڵ تورکیا گەیشتووەتە 200 ملیار یۆرۆ و ئەمەش ریکۆردێکی پێوانەییە".
بەگوێرەی راپۆرتەکە، یەکێتیی ئەوروپا دەیەوێت پەیوەندییەکانی لەگەڵ تورکیا بە ئامانجی گۆڕانی دۆخی جیۆپۆلەتیکی و ئەمنی باشتر بکات و لەم دواییانەشدا دەرفەت بۆ ئەمە رەخساوە. بۆ نموونە باس لەوە دەکرێت کە تورکیا لەم دواییانەدا هەوڵی کەمکردنەوەی گرژییەکانی دەریای ناوەڕاست دەدات و لە پەیوەندییەکانی لەگەڵ بەشێک لە ئەندامانی یەکێتیی ئەوروپا بە شێوەیەکی ئەرێنی مامەڵە دەکات.
لە راپۆرتەکەدا، لەبری ئەندامێتی لە یەکێتیی ئەوروپا، داوای دیالۆگی ئاستی باڵا کراوە، لە بواری کۆچ و وزە، بازرگانی و ڤیزا بۆ هاووڵاتیانی تورکیا هاوکاری بکرێت.
لە راپۆرتەکەدا سەبارەت بە پێدانی ڤیزا بە هاووڵاتییانی تورکیا نووسراوە، "تورکیا پێوەرە پێویستییەکانی پێدانی ڤیزەی بێبەرامبەری تەواو نەکردووە". ئەنجوومەنی ئەوروپا و کۆمیسیۆنی یەکێتی ئەوروپا پاڵپشتی تەکنیکی پێشکەش بە تورکیا دەکەن بۆ جێبەجێکردنی مەرجە پێویستەکان.
پەیوەندییەکانی نێوان تورکیا و یەکێتی ئەوروپا بۆ ئەندامێتیی تورکیا لە ساڵی 2018ـەوە راگیراوە.
لە راپۆرتەکەدا، سەبارەت بە پرسی قوبرس، دەریای ناوەڕاست، جێبەجێنەکردنی هەندێک لە بڕیارەکانی دادگەی مافی مرۆڤی ئەوروپا، سەروەریی یاسا و پێشێلکردنی مافەکانی مرۆڤ، رەخنەی زۆر لە تورکیا گیراوە و وەک بەربەست لەبەردەم پەیوەندییەکاندا ئاماژەی پێدراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ