وێنەی لای راست منداڵەکە (CAIR/HANDOUT VIA REUTERS)، وێنەی لای چەپ تۆمەتبارەکە (WILL COUNTY SHERIFF'S OFFICE)
رووداو دیجیتاڵ
منداڵێکی موسڵمانی تەمەن شەش ساڵ لە ئەمریکا لەلایەن خاوەن خانووەکەیانەوە بە چەقۆ کوژرا و دایکیشی بریندارکرا. پۆلیس دەڵێت، چەقۆوەشێنەکە دەستگیرکراوە و رووداوەکەش پەیوەندیی بەوەوە هەیە، ئەو خێزانە فەلەستینین.
رووداوەکە لە شارۆچکەی پلەینفیڵد لە دووری 64 کیلۆمەتر لە رۆژئاوای شاری شیکاگۆی ویلایەتی ئیلینۆی روویدا، دوای ئەوەی پیاوێکی تەمەن 71 ساڵ بەناوی جۆسێف سیزوبا بە چەقۆ هێرشیکردە سەر کرێچییەکانی خۆی کە منداڵێکی تەمەن 6 ساڵ بە ناوی وەدیع فەیومی و دایکە تەمەن 32 ساڵەکەی بە ناوی حەنان شاهین بوون. هەردووکیان بە برینداری گوێزرانەوە نەخۆشخانە، بەڵام کوڕەکە بەهۆی سەختیی برینەکەیەوە گیانی لەدەستدا.
پۆلیسی ناوچەکە دەڵێت، "دوای ئەوەی دایکی منداڵەکە پەیوەندی بە هێڵی گەرمی 911ـەوە کرد، تیمەکانمان دەستبەجێ گەیشتنە شوێنی رووداوەکە و هەر لەوێ ئەنجامدەری تاوانەکەیان دەستگیرکرد و بەپەلە هەردوو بریندارەکەیان گواستەوە نەخۆشخانە. لە توێکاریدا دەرکەوتووە کوڕەکە 26 چەقۆی بەرکەوتووە و دایکیشی هێشتا لەژێر چاودێریی چڕی پزیشکییدایە. ژنەکە پێی راگەیاندین، شەڕێکی زۆری لەگەڵ چەقۆوەشێن کردووە و رایکردووەتە نێو گەرماوەکە بۆ ئەوەی دەرفەتی پەیوەندیکردنی بە پۆلیسەوە هەبێت."
پۆلیس هەروەها دەڵێت، "ئەنجامدەری تاوانەکە هێرشی کردووەتە سەر ئەو خێزانە، چونکە موسڵمانن و خەڵکی فەلەستینن. ئەو کەسە دەبردرێتە دادگە و بە تۆمەتی کوشتن و بریندارکردن و رەگەزپەرستی، دادگایی دەکرێت."
جۆ بایدن، سەرۆکی ویلایەتە یەکگرتووەکانی ئەمریکا لەوبارەوە گوتی، "بەتووندی سەرکۆنەی ئەو هێرشە ناڕەوایە دەکەم. ئەو خێزانە فەلەستینییە روویان لە ئەمریکا کرد بۆ ئەوەی پەنایەکیان هەبێت تاوەکو بە ئاسوودەیی بژین، فێربن و نوێژ بکەن."
جۆ بایدن گوتیشی، "ئەم کارە پڕ لە رق و کینەیە لە ئەمریکا جێگەی نابێتەوە و دژی بەهایەکی بنچینەیی ئێمەیە کە بریتییە لە ئازادی لەوەی ئێمە کێین و چۆن نوێژ دەکەین. داوا لە هەموو ئەمریکییەکان دەکەم دژی ئیسلامۆفۆبیا بووەستنەوە."
ئەحمەد ریحاب، سەرۆکی ئەنجوومەنی پەیوەندییەکانی ئەمریکی-ئیسلامی لە شیکاگۆ لەو بارەوە گوتی، "دایکەکە لە نەخۆشخانە نامەیەکی بۆ هاوژینی پێشووی ناردووە و رووداوەکەی گێڕاوەتەوە."
لە نامەکەدا هاتووە، "ئەنجامدەری تاوانەکە لە دەرگەی دا و سەرەتا ویستی بمخنکێنێت؛ هەروەها گوتی، ئێوەی موسڵمان، پێویستە بمرن."
ئەحمەد ریحاب گوتیشی، "ئەو رووداوە پەیوەندی بە شەڕی ئیسرائیل و حەماسەوە هەیە. ئەم خێزانە خەڵکی کەرتی رۆژئاوای فەلەستینن. 12 ساڵ لەمەوبەر هاتوونەتە ئەمریکا و وەدیعیش هەر لێرە لەدایکبووە و هاووڵاتییەکی ئەمریکی-فەلەستینی بوو."
ئەم هێرشە لە کاتێکدایە، بزووتنەوەی حەماس لە 7-10-2023 ئۆپەراسیۆنی ناولێنراو بە "تۆفانی ئەقسا"ـی دژی ئیسرائیل راگەیاند؛ لە وەڵامدا ئیسرائیل ئۆپەراسیۆنی ناولێنراو بە "شمشێری پۆڵایین"ـی راگەیاند و هەمان رۆژ، سەرۆکوەزیرانی ئیسرائیل پەیامێکی تووندی ئاراستەی حەماس کرد و گوتی،" ئیسرائیل بە رۆژانێکی سەختدا تێدەپەڕێت، بەڵام حەماس باجی ئەم کارەی دەدات."
بەپێی دوایین ئامارەکانی تەندروستیی فەلەستین، ژمارەی ئەو کەسانەی بەهۆی هێرشەکانی ئیسرائیلەوە لە کەرتی غەززە گیانیان لەدەستداوە، گەیشتووەتە دوو هەزار و 670 کەس و نۆ هەزار و 600ـی دیکەش برینداربوون. لە کەرتی رۆژئاوای فەلەستینیش، لانیکەم 54 کەس کوژراون و هەزار و 100ـی دیکەش بریندار بوون.
بەگوێرەی نووسینگەی سەرۆکوەزیرانی ئیسرائیل، زیاتر لە هەزار و 400 کەس لە ئیسرائیل بەهۆی هێرشەکانی حەماسەوە کوژراون و لانیکەم سێ هەزار و 400 کەسیش بریندارن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ