هەڵەیەک روویدا! دووبارە هەوڵبدە
دوو ساڵە ئابووری ئەڵمانیا بەرەو دابەزین دەڕوات.
رووداو دیجیتاڵ
بەشێک لە خاوەنکارانی ئەڵمانیا، لەوانەش کوردەکان، لە بەرزبوونەوەی هەڵاوسان و کێشەی ئابووری نیگەرانن و دەڵێن، ساڵ دوای ساڵ دۆخەکە خراپتر دەبێت.
شەقامی کوڵنێر لە شاری دووسڵدۆرفی ئەڵمانیا، کە بە شەقامی کوردان ناسراوە، دەکەوێتە هەرێمی نۆردراین ڤێستڤاڵن. هەرێمەکە بە بڕبڕەی پشتی ئابووریی ئەڵمانیا دادەنرێت.
شەقامی کۆڵنێر پڕە لە مارکێت و شوێنی بازرگانی کە بەشێکی بەرچاویان لە لایەن کوردانی ئەڵمانیاوە خاوەندارێتییان دەکرێت.
ئەو خاوەنکارە کوردانە دەڵێن، کۆرۆنا و شەڕی ئۆکراینا و رووسیا کاریگەری نەرێنی گەورەی لەسەر بازاڕی ئەڵمانیا دروستکردووە.
رزگار عەلی، خاوەن کۆمپانیایە لە دووسڵدۆرف و بە پەیام سەربەست، نێردراوی رووداوی بۆ رووماڵی هەڵبژاردنی پەرلەمانی ئەڵمانیا گوت: "پێشتر هەر کارمەندێکم، ئەگەر بۆ نموونە 1600 یۆرۆی وەرگرتبا، بەشی ژیانی مانگانەی دەکرد و زۆریشی لێدەمایەوە، بەڵام ئێستا هەمان بڕەپارە بەشی ناکات و لە 10ـی مانگدا پارەی پێ نامێنێت."
سەردار سندی، دووکانی زێڕەنگەری هەیە و بە پەیام سەربەستی راگەیاند: "لە دووساڵی رابردوودا نرخی خۆراک و سووتەمەنی دوو بەرامبەر بەرزبووەتەوە؛ کرێی خانووش زۆر گران بووە و بارگرانی دروستکردووە."
مەحموود عەلی، کوردە و خاوەن چێشتخانەیە لە دووسڵدۆرف بە نێردراوی رووداوی گوت: "ئابووری ئەڵمانیا ساڵ دوای ساڵ خراپتر دەبێت؛ هەر حیزبێک دێتە سەر حوکم دەڵێت دۆخەکە باش دەکەم و کەچی خراپتر دەبێت؛ هیچیان راست ناکەن و باوەڕمان بە دەنگدان نەماوە."
ئەڵمانیا لە رووی بەهێزی ئابوورییەوە یەکەمی ئەورووپا و سێیەمی جیهانە، بەڵام لە دوو ساڵی رابردوودا ئابوورییەکەی رووی لە پاشەکشە کردووە.
لە دوای جەنگی جیهانی دووەمەوە بۆ یەکەمجار ئابووری ئەڵمانیا لە ساڵی 2020 بە رێژەی 4.3٪ دابەزی؛ دوایین ئامارەکان دەڵێن لە مانگی یەکەمی ئەم ساڵدا هەڵئاوسان لە ئەڵمانیا گەیشتووەتە 2.3٪.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ