رووداو دیجیتاڵ
وەزیرانی دەرەوەی تورکیا و عێراق لە پایتەختی ئازەربایجان کۆبوونەوە. جگە لە وەزیری دەرەوەی عێراق، هاکان فیدان لەگەڵ هەروو وەزیرانی دەرەوەی کوێت و جەزائیریش کۆبووەتەوە.
وەزارەتی دەرەوەی تورکیا لە هەژماری فەرمیی خۆی لە تویتەر رایگەیاند، هاکان فیدان، وەزیری دەرەوەی تورکیا و فوئاد حوسێن، وەزیری دەرەوەی عێراق رۆژی چوارشەممە 5ی تەممووزی 2023 لە باکۆی پایتەختی ئازەربایجان کۆبوونەتەوە.
وەزیری دەرەوەی تورکیا لە پەراوێزی کۆبوونەوەی وەزیرانی دیوانی هەماهەنگیی بزووتنەوەی بێ لایەنەکان لە شاری باکۆ لەگەڵ سێ هاوتای کۆبووەوە و وەزارەتی دەرەوەی تورکیاش وێنەی دیدارەکانی بڵاوکردەوە.
بەگوێرەی هەمان سەرچاوە، هاکان فیدان لەگەڵ فوئاد حوسێن، وەزیری دەرەوەی عێراق؛ شێخ سالم عەبدوڵڵا ئال جابر ئال سەباح، وەزیری دەرەوەی کوێت و ئەحمەد عەتتاف، وەزیری دەرەوەی جەزائیر کۆبووەتەوە.
کۆبوونەوەی وەزیرانی دیوانی هەماهەنگیی بزووتنەوەی بێ لایەنەکان لە رۆژی 5ی تەممووز لە باکۆی پایتەختی ئازەربایجان دەستیپێکردووە و ئەمڕۆ دوایین رۆژی کۆبوونەوەکانیانە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ