رووداو دیجیتاڵ
مەسعود ئۆزیلی ئەستێرەی پێشووی ریال مەدریدی ئیسپانی، بووە ئەندامی سەرکردایەتیی ئاکپارتی، کە رەجەب تەیب ئەردۆغان، سەرۆککۆماری تورکیا، سەرۆکایەتیی دەکات.
لە هەشتەمین کۆنگرەی پارتی داد و گەشەپێدان (ئاکپارتی) کە رۆژی یەکشەممە لە ئەنقەرە بەڕێوەچوو، رەجەب تەیب ئەردۆغان، بۆ جاری نۆیەم بە سەرۆکی ئاکپارتی هەڵبژێردرایەوە و ئۆزێلیش بووە ئەندامی سەرکردایەتیی پارتەکە.
لە کۆنگرەکەدا، 75 ئەندامی ناوەندی بەڕێوەبردن و بڕیاری ئاکپارتی هەڵبژێردران، کە یەکێک لەو ئەندامانە مەسعود ئۆزیل، یاریزانی پێشووی هەڵبژاردەی ئەڵمانیا و یانەکانی ڤێردەربرێمەن، ریال مەدرید، ئارسیناڵ، فەنەرباهچە و باشاک شهیر بوو.
لیستە 75 ئەندامییەکەی سەرکردایەتیی ئاکپارتی بڵاوکرایەوە کە مەسعوود ئۆزیل ژمارە 43یە تێیدا.
مەسعود ئۆزیل، لە ئەڵمانیا لەدایکبووە. هەندێک سەرچاوە ئۆزێل بەکورد و خەڵکی باکووری کوردستان ناودەبەن، بەڵام ئەو خۆی لە هیچ بۆنەیەکدا دانی بەکوردبوونی خۆیدا نەناوە.
ئۆزیل هەروەها لە نێوان 2009 تاوەکو 2018 یاریی بۆ هەڵبژاردەی ئەڵمانیا کردووە. لەگەڵ ئەو هەڵبژاردەیە نازناوی مۆندیالی 2014 بەدەستهێناوە.
ئۆزێل لە مۆندیالی 2014ی بەرازیل، گۆڵێکی تۆمارکرد و دوو ئەسیستی هەبوو. رۆژی 22-3-2023 بە فەرمی وازی لە یاریی تۆپی پی هێنا.
پارتی داد و گەشەپێدان (ئاکپارتی) رۆژی 14-8-2001 لەلایەن رەجەب تەیب ئەردۆغان و هاوڕێکانییەوە دامەزرا.
لەوەتەی دامەزرانییەوە تاوەکو ئێستا جڵەوی دەسەڵاتی تورکیای لەدەستە و لە هەموو هەڵبژاردنە پەرلەمانییەکاندا پلەی یەکەمی بەدەستهێناوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ