خوان لاپۆرتا، سەرۆکی بارسێلۆنا
رووداو دیجیتاڵ
بڕیاردان لەبارەی چارەنووسی دانی ئۆلمۆ و پاو ڤیکتۆر لە بەرژەوەندی یانەی بارسێلۆنا و رێگەدان بە بەردەوامبوون لە یارییکردن بۆ یانەکە، خوان لاپۆرتا سەرۆکی یانەکەی زۆر دڵخۆشکردووە.
بەر لە یارییەکەیان بەرامبەر ئاتلێتیک بیلباو، لاپۆرتا شێتانە دڵخۆشی خۆی پێشاندا، وەکو ئەوەی نازناو و دەستکەوتێکی زۆر گرنگی بردبێتەوە، لە رێڕەوی شوێنی تایبەتی یاریگە یەک بە خۆی هاوار دەکات و ئاهەنگ دەگێڕێت.
ئیسحاق موتۆ کەسایەتییەکی نزیکی فیدراسیۆنی تۆپی پێی ئیسپانیایە، دەڵێت "لاپۆرتا لە شوێنی کەسایەتییە تایبەتەکان لە یاریگەدا کۆنتڕۆڵی خۆی لەدەستدا، سەرەتا دانی ئۆلمۆ و پاو ڤیکتۆری لە باوەشکردووە و دوای ئەوەش دەستی بە هاوارکردن کردووە."
لاپۆرتا لەنێو ئەو دڵخۆشییەدا چەندجارێک هاواری کردووە، کوڕانی سۆزانی و ئەم قسانەی بەو شێوەیە لێکدرایەوە کە مەبەستی فیدراسیۆنی تۆپی پێ و دەستەی بەڕێوەبردنی لالیگا بووە.
جگە لەمەش لاپۆرتا سووکایەتیی بە ئەنجوومەنی فیدراسیۆنی تۆپی پێی ئیسپانیا و سەرۆکایەتی فیدراسیۆنەکەش کردووە و چەندجارێک بەبێ شەرەف ناوی هێناون.
ئەو کاتەی لاپۆرتا ئەو قسانەی کردووە، سەرۆکی فیدراسیۆنی تۆپی پێ لە یاریگە نەبوو و دوای ئەوە گەیشتووەتە ئەوێ، بەڵام بەدرێژایی رۆژەکە پەیوەندیی نێوان هەردوولا زۆر خراپ بووە.
بارسێلۆنا، لە قۆناخی پێشکۆتایی جامی سوپەری ئیسپانیا بە دوو گۆڵی بێبەرامبەر لە یانەی ئاتلێتیک بیلباوی بردەوە و گەیشتە یاری کۆتایی.
چەند رۆژێک لەمەوبەر، میدیای نزیک لە یانەی بارسێلۆنا رایانگەیاند، لاپۆرتا بەڵێنی چارەسەرکردنی کێشەکانی بە دانی ئۆلمۆ و پاو ڤیکتۆر داوە و پێیگوتوون، دڵنیابن لەوەی هەموو شتێک دەکەین بۆ ئەوەی کێشەکان چارەسەر بکەین و ئێوەش بەشداری لە یارییەکاندا بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ