خۆپێشاندان بۆ زیادکردنی مووچەی خانەنشینی لە تورکیا
رووداو دیجیتاڵ
رۆژی دووشەممە سەندیکای سەرجەم خانەنشینانی ساڵی 2021، داوایان کرد بەپێی هەڵاوسانی راستەقینە مووچەی خانەنشینان زیاد بکرێت.
خانەنشینێک دەڵێت، "چەندین ساڵ کارمان کرد و باج و پارەی بیمەمان دا. مافی ئەوەمان بەدەستهێنا کە تاوەکو کۆتایی تەمەنمان مرۆڤانە بژین. هەربۆیە داواکارییەکانمان جارێکی دیکە رادەگەیێنین. مووچەی سەرجەم خانەنشینان، پارەی مانگانەی بێوەژن و هەتیوەکان بەپێی هەڵاوسانی راستەقینە دەستبەجێ زیاد بکرێت."
لە مانگی ئایاری ئەمساڵدا خەرجیی پێویست بۆ خۆراکی تەندروست و هاوسەنگ بۆ خێزانێکی چوار کەسی لە تورکیا 10 هەزار و 72 لیرە بوو؛ لە کاتێکدا سنووری برسێتی 10 هەزار لیرەی تێپەڕاند و هێڵی هەژاریش گەیشتە 35 هەزار لیرە.
سەلمان هورکارداش، سەرۆکی سەندیکای سەرجەم خانەنشینانی 2021 دەڵێت، "جارێكی دیکە داوا لە دەسەڵاتی سیاسی دەکەین. خانەنشینان برسین، کرێکاران، کۆڵبەران، دووکانداران، هەموو گەلەکەمان برسی و پەرێشانن. ئەمڕۆ نزیکەی 66 بۆ 70 ملیۆن کەس لەم وڵاتەدا لەژێر هێڵی هەژاریدا دەژین. ئەمڕۆ سنووری برسێتی گەیشتووەتە 13 - 14 هەزار لیرە. دەبێت کەمترین بڕە مووچە بەلایەنی کەمەوە 15 هەزار لیرە بێت."
لە مانگی کانوونی یەکەمی ساڵی رابردوودا، بە لەبەرچاوگرتنی هەڵاوسان، مووچەی خانەنشینان، بە رێژەی 30% زیاد کرا.
دوای ئەم زیادکردنە، کەمترین مووچەی خانەنشینی بۆ 5500 لیرە بەرزبووەوە، بەڵام دواتر کەمترین مووچەی خانەنشینی بۆ 7500 لیرە بەرز کرایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ