293 کەس لە تورکیا بە تۆمەتی بازرگانی و بەکارهێنانی هۆشبەر دەستبەسەر کران

 

 

عەلی یەرلیکایا، وەزیری ناوخۆی تورکیا ئەمڕۆ چوارشەممە 18ی ئەیلوول لە هەژماری تایبەتی خۆی لە تۆڕی کۆمەڵایەتی ئێکس ئەنجامی ئەو ئۆپەراسیۆنەی بڵاوکردەوە کە بۆ سەر بازرگان و بەکارهێنەرانی مادەی هۆشبەر ئەنجامدراوە.

 

بە گوتەی یەرلیکایا، لە 44 پارێزگا لەنێویاندا ئەنقەرە، ئیستەنبووڵ، ئانتاڵیا و ئیزمیری تورکیا و ئامەد، دیلۆک، مەڵەتی، رووها، مەڕەش، شرنەخ، مووش، خارپێت، سەمسوور و ئەرزینگانی باکووری کوردستان، بە بەشداریی 681 تیم و 1876 ئەندامی هێزی ئەمنی و 9 هێلیکۆپتەر و فڕۆکەی بێفڕۆکەوان و 26 سەگ، ئۆپەراسیۆنەکە بەڕێوەچووە و 293 تۆمەتبار دەستبەسەر کراون.

 

لە ئۆپەراسیۆنەکەدا هێزە ئەمنییەکان دەستیان بەسەر 470 کیلۆ مادەی هۆشبەر و چوار ملیۆن و 945 هەزار و 832 حەبی هۆشبەردا گرتووە.