رووداو - هەولێر
سەرۆککۆماری پێشووی تورکیا لە دیمانەیەکدا ئاماژەی بەوە دا، کێشەی کورد بووە بە پرسێکی نێودەوڵەتی، یەکێکە لە گرینگترین پرسەکانی تورکیا و پێویستە تورکیا بگەڕێتەوە بۆ سیستەمی پەرلەمانی.
عەبدوڵڵا گول، سەرۆککۆماری پێشووی تورکیا رایگەیاند، "بە بەراورد بە وڵاتانی دیکە، زۆرترین کورد لە تورکیادا نیشتەجێن. کاتێک گفتوگۆکان لەبارەی ریفراندۆمەکەی بارزانییەوە دەکرا، "ریفراندۆمی سەربەخۆیی هەرێمی کوردستان"، زۆر سەرنجڕاکێش بوو. لە سی ئێن ئێن تورک لەسەر نەخشە گفتوگۆدەکرا، لەسەر نەخشە کوردی هەر چوار وڵات نیشاندەدرا. دواتر تەمەشای سی ئێن ئێن ئینتەرناشناڵم کرد، لەسەر هەمان نەخشە گفتوگۆ دەکرا، لە بەشی تورکیا 15 ملیۆن، لە عێراق چوار ملیۆن، لە سووریا دوو ملیۆن و لە ئێران شەش ملیۆن کورد نووسرابوو. لەسەر نەخشەکەی تورکیا ئەو ژمارانە نەبوو، ئەمە راستییە، ئەوەندە کورد لە تورکیادا دەژین، بەڵام تاوەکو چەند ب ەیەکسانی وەک هاووڵاتی هەڵسوکەوتیان لەگەڵدا دەکرێت؟"
هەروەها عەبدوڵڵا گول باسی لەوەش کرد، "ئەگەر ئەم کێشەیە لەنێو خۆماندا چارەسەر بکەین، وڵاتەکەمان و ناوچەکەش بەهێزتر دەکەین. بەڵام دەترسم لەوەی ئەم کێشەیە لە وڵاتەکەی خۆماندا چارەسەر نەکەین، کێشەکە تەنیا لەنێو وڵاتدا نامێنێتەوە و رەهەندێکی نێودەوڵەتی لەخۆ دەگرێت".
11یەمین سەرۆککۆماری تورکیا ئەوەی خستەڕوو، پێویستە تورکیا بگەڕێتەوە بۆ سیستەمی پەرلەمانی و پشتگیریی خۆیشی بۆ ئەو پارتە نوێیە راگەیاند کە بڕیارە لەلایەن عەلی باباجان، وەزیری پێشووتری ئابووریی تورکیاوە لە هەفتەی یەکەمی مانگی ئاداری داهاتوودا رابگەیێنرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ