رووداو دیجیتاڵ
بەگوێرەی داتاکانی دامەزراوەی ئاماری تورکیا، ساڵی رابردوو زیاتر لە یەک ملیۆن رووداوی هاتووچۆ لە باکووری کوردستان و تورکیا روویانداوە. بەهۆیانەوە زیاتر لە 6000 کەس گیانیان لەدەستداوە. هەڵەی شۆفێر لە رووداوە کوشندەکاندا 89% بووە.
دامەزراوەی ئاماری تورکیا رۆژی پێنجشەممە 16ی ئایار ئاماری رووداوەکانی هاتووچۆی بۆ ساڵی 2023ی بڵاوکردەوە. بەگوێرەی داتاکان، یەک ملیۆن و 314 هەزار و 136 رووداوی هاتووچۆ لە باکووری کوردستان و تورکیا روویانداوە؛ یەک ملیۆن و 79 هەزار و 65 لەو رووداوانە وەک رووداوی هاتووچۆ بە زیانی ماددی تۆمار کراون، 235 هەزار و 71 رووداویش وەکو رووداوی هاتووچۆ بە مردن یان برینداربوون تۆمار کراون.
مردن بە رووداوی هاتووچۆ 25.2% زیادیکردووە
دوو هەزار و 984 کەس لە شوێنی رووداوەکان گیانیان لەدەستداوە، هەروەها سێ هەزار و 564 کەس لەدوای 30 رۆژ بەهۆی سەختیی برینەکانیان گیانیان لەدەستداوە. رۆژانە بە تێکڕا 644 رووداو روویانداوە، 18 کەس مردوون و 961 کەسیش بریندار بوون.
لە کاتێکدا ساڵی 2023 ژمارەی ئۆتۆمبێل لە هاتووچۆدا بەراورد بە ساڵی پێشوو 8.5% زیادیکردووە، کۆی گشتیی رووداوەکان 6.6% زیادی کردووە. رێژەی رووداوەکانی مردن و بریندار بوون 19.2%، ژمارەی ئەو رووداوانەی زیانێکی ماددییان هەیە 4.2%، کۆی ژمارەی مردنەکان 6.6% و ژمارەی بریندارەکان 21.5% زیادیان کردووە.
بەپێی ئاماری پارێزگاکان، زۆرترین ژمارەی گیانلەدەستدان و برینداربوون بە رووداوی هاتووچۆ لە ئیستەنبووڵ تۆمار کراون. لەو پارێزگایەدا 347 کەس گیانیان لەدەستداوە و 32 هەزار و 452 کەیش بریندار بوون. کەمترین گیانلەدەستدان لە دێرسمی باکووری کوردستان بووە، کە لەو پارێزگایە تەنیا پێنج کەس گیانیان لەدەستداوە، کەمترین برینداریش لە ئەردەخانی باکووری کوردستان بووە کە 304 کەس بریندار بوون.
45.5%ی ئەوانەی گیانیان لەدەستداوە شۆفێرن
لە کۆی 235 هەزار و 71 رووداو کە مردن و برینداربوونیان تێدا بووە، 195 هەزار و 321 رووداو لە ناوچەکانی نیشتەجێبوون و 39 هەزار و 750 رووداویش لە دەرەوەی ناوچەکانی نیشتەجێبوون روویانداوە. 55.3%ی گیانلەدەستدان بە رووداوی هاتووچۆ و 77.3%ی بریندارەکان لە ئەنجامی رووداوەکانی ناوچەکانی نیشتەجێبوون روویانداوە، 44.7%ی گیانلەدەستدان و 22.7%ی بریندارەکان لە ئەنجامی رووداوەکانی دەرەوەی ناوچەی نیشتەجێبوون روویانداوە.
ئەوانەی گیانیان لەدەستداوە، 45.5% شۆفێر، 32.3% سەرنشین و 22.2% پیادەن. هەروەها 75.1%ی ئەوانەی گیانیان لەدەستداوە پیاون و 24.9%یان ژنن. لە بریندارەکانیش 68.7% پیاون و 31.3%یش ژنن.
رێژەی هەڵەی شۆفێر 89%ـە
لە کۆی 389 هەزار و 362 رووداوی هاتووچۆ کە مردن و برینداری لێکەوتووەتەوە، 48.5% بە ئۆتۆمبێلی تایبەت، 23.8% ماتۆڕسکیل، 14% پیکاپ، 2.4% مینی پاس، 2.3% پاسکیل، 2.3% کرێن، 1.9% بارهەڵگر، 1.7% پاس، 0.8% تراکتۆر و 2.4%یان بە ئۆتۆمبێلی دیکە بوون.
لە کۆی 317 هەزار و 510 هەڵە کە بوونەتە هۆی رووداوی هاتووچۆی کوشندە، 89%یان بەهۆی شۆفێر بووە، 8.3% بەهۆی پیادە، 1.5% بەهۆی ئۆتۆمبێل، 0.7% بەهۆی سەرنشین و 0.4%ی هەڵەکان بەهۆی کێشەی رێگەوبانەوە بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ