رووداو دیجیتاڵ
رێکخراوێکی نێودەوڵەتی دەڵێت، زیاتر لە 100 کۆگەی چەکی کیمیایی لە سووریا ماون؛ ئاماژە بەوەش دەکات، ژمارەیەک لەو کۆگەیانە بە نهێنی ماونەتەوە و دۆزینەوەیان ئاسان نابێت.
رێکخراوی قەدەخەکردنی چەکی کیمیایی کە تایبەتە بە تۆمارکردن و چاودێریکردنی چەکی کیمیایی لە جیهاندا بڵاویکردەوە، زیاتر لە 100 کۆگەی چەکی کیمیایی لە سووریا ماون؛ ئاماژە بەوەش دەکات، پلانیان هەیە لەگەڵ بەرپرسانی نوێی سووریا قسە بکات بۆ ئەوەی پسپۆڕەکانی سەردانی ئەو وڵاتە بکەن و لەنزیکەوە ئەو کۆگەیانە ببینن.
بەگوێرەی رێکخراوەکە، ئەو کۆگەیانە لە توێژینەوە، دروستکردن و کۆگەکردنی مادەی کیمیایی و چەکی کیمیایی رۆڵیان هەبووە کە لە شەڕی 14 ساڵەی نێوخۆی ئەو وڵاتەیشدا دەسەڵاتی ئەسەد چەندین جار تۆمەتبارکرا بەوەی چەکی کیمیایی بەکارهێناوە.
مانگی رابردوو، ئەسعەد شەیبانی، وەزیری دەرەوەی سووریا، سەردانی بارەگەی سەرەکی رێکخراوی قەدەخەکردنی چەکی کیمیایی لە شاری لاهای هۆڵەندا کرد و رایگەیاند، حکومەتەکەی پابەند دەبێت بە یاسا نێودەوڵەتییەکان تایبەت بە چەکی کیمیایی؛ گوتیشی: "هەموو پاشماوەیەکی چەکی کیمیایی کە لەلایەن رژێمی ئەسەدەوە پەرەی پێدراوە، لەنێودەبەن".
لەگەڵ رووخانی دەسەڵاتی ئەسەد لە 08ـی کانوونی یەکەمی رابردوودا زۆر لە وڵاتانی رۆژئاوا نیگەران بوون چەکە کیمیایی دەسەڵاتی ئەسەد بکەوێتە دەست گرووپە چەکدارەکانی سووریا.
لە 10 ساڵی رابردوودا، حکومەتی ئەمریکا سزای بەسەر 300 کەسایەتی و دامەزراوەی تایبەت بە بەرنامەی چەکی کیمیایی سووریادا سەپاند.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ