هەڵەیەک روویدا! دووبارە هەوڵبدە
رووداو دیجیتاڵ
عەمار حەکیم، سەرۆکى رەوتى حیکمە داواى لە کۆمەڵگەى نێودەوڵەتى کرد، دۆخى هەستیارى عێراق لە بەرچاو بگرن لە هاودەکردنى گاز و کارەبا لە وڵاتانى دراوسێیەوە و ئەگەر شەڕ لە ناوچەکە هەڵگیرسێت و تەشەنە بکات، عێراق و وڵاتانى دراوسێى لە "نێوەڕاستى گەردەلوولەکە" دەبن.
ئەو گوتانەى عەمار حەکیم بەبۆنەى یەکەم رۆژى جەژنى رەمەزان بوو، کە شیعەکان لە عێراق رۆژی دووشەمە 31ى ئادارى 2025یان دیاریکرد.
عەمار حەکیم کە هاوکات سەرۆکى هاوپەیمانیى هێزەکانى دەوڵەتى نیشتمانیە، گوتى، "گەلێک خزمەتیان نەکەین شایستەى ئەوە نابین نوێنەرایەتییان بکەین، هەر کەسێک خۆى یان گرووپەکەى بە گەورەتر لە گەلەکەى بزانێت لە ئێمە نییە، ئێمە پێویستمان بە نوێنەرانێکە کە خەمى خەڵک هەڵبگرن بەر لە خەمى خۆیان".
سەرۆکى رەوتى حیکمە داواى لە کۆمەڵگەى نێودەوڵەتى کرد دۆخى هەستیارى عێراق لە بەرچاو بگرن و هەڵاوێردى بکەن لە پرسى هاوردەکردنى گاز و کارەبا لە وڵاتانى دراوسێوە، تاوەکو ئەو کاتەى پڕۆژەکانى بۆ دابینکردنى ئەو پێویستیانە دەکەونەکار.
ئەو دەرفەتەى کە ئەمریکا دابووى بە عێراق بۆ هاودەکردنى کارەبا لە کۆمارى ئیسلامىی ئێرانەوە کۆتایی هات، واشنتن کۆتوبەندى لەسەر هاودەکردنى گازیش داناوە لەو وڵاتەوە، لەکاتێکدا عێراق بۆ بەرهەمهێنانى وزەى کارەبا پێویستییەتى.
لەبارەى دۆخى ناوچەکە، سەرۆکى رەوتى حیکمە گوتى، "هەڵگیرسانى جەنگێکى سەرتاسەرى لەم ناوچەیە دەرهاویشتەکانى تەنیا لەسەر وڵاتانى ناکۆک نابێت، ئەگەر رێگە بدرێت ئاگرەکە تەشەنە بسەنێت، عێراق و وڵاتانى دراوسێى لە نێوەڕاستى گەردەلوولەکە دەبن".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ