رووداو دیجیتاڵ
بەرگریی شارستانیی کەرتی غەززە دەڵێت، لە هێرشێکی ئیسرائیلدا بۆ سەر باڵەخانەیەکی نیشتەجێبوون لە کەرتی غەززە 93 کەس کوژراون. ئاماژە بەوەش دەکات، زۆربەی کوژراوەکان ژن و منداڵ بوون.
رۆژی 29-10-2024 بەرگریی شارستانیی کەرتی غەززە بڵاویکردەوە، "لە کۆمەڵکوژییەکەی شەوی رابردوودا 93 کەس شەهید بوون و 40 کەسی دیکەش بێسەروشوێنن."
بەگوێرەی کارمەندانی بەرگریی شارستانیی کەرتەکە، زۆربەی کوژراوەکان ژن و منداڵ بوون.
بزوتنەوەی حەماسی فەلەستینی سەرکۆنەی هێرشەکەی کرد و رایگەیاند، "دووژمن کۆمەڵکوژییەکی دیکەی بەرامبەر خەڵکی ئێمە ئەنجامدا و باکووری غەززەش بووەتە ئامانجی هەڵمەتێکی پاکتاویی نەتەوەیی و ئاوارەکردنێکی سیستماتیکی."
سوپای ئیسرائیل دەڵێت، لێکۆڵینەوە لە رووداوەکە دەکەن.
جەنگی ئیسرائیل و بزووتنەوەی حەماس لە 7ی ئۆکتۆبەری 2023 بە هێرشێکی حەماس بۆ سەر ئۆردووگا جوونشینەکانی نزیک لە کەرتی غەززە دەستیپێکرد.
بەگوێرەی ئیسرائیل، لە هێرشەکەدا هەزار و 200 کەس کوژران و 251 کەسیش بە بارمتە گیران.
هەمان رۆژ سوپای ئیسرائیل دەستی بە بۆردوومانکردنی کەرتی غەززە کرد و دواتریش ئۆپەراسیۆنی زەوینی دەستپێکرد.
بەگوێرەی وەزارەتی تەندروستی کەرتی غەززە، لە ئەنجامی هێرشەکانی ئیسرائیل بۆ سەر کەرتەکە زیاتر لە 43 هەزار کەس کوژراون و زیاتر لە 100 هەزار کەسی دیکەش برینداربوون، ئەوە جگە لە ئاوارەبوونی نزیکەی تەواوی 2.3 ملیۆن دانیشتووی کەرتەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ