رووداو دیجیتاڵ
بزووتنەوەی حەماس داوا لە سەرکردەی وڵاتانی عەرەبی دەکات، پلانەکەی سەرۆکی ئەمریکا بۆ کەرتی غەززە و گواستنەوەی ئاوارەکان بۆ وڵاتانی ناوچەکە "پووچەڵ"، بکەنەوە و جەختیش لەوە دەکاتەوە؛ وڵاتانی عەرەبی رۆڵێکی کارا لە بنیاتنانەوەی کەرتەکە بگێڕن.
رۆژی سێشەممە، چواری ئاداری 2025، بزووتنەوەی حەماس لەبارەی لووتکەی ئەمڕۆی وڵاتانی عەرەبی لە قاهیرەی پایتەختی میسر، بەیاننامەیەکی بڵاوکردەوە و رایگەیاند "چاومان لەوەیە وڵاتانی عەرەبی رۆلێکی باڵایان هەبێت لە کۆتاییهێنان بەو کارەساتە مرۆییەی لە دەرئەنجامی داگیرکاریی کەرتی غەززە دروست بووە. لەگەڵ ئەوەش ئەو پیلانەی داگیرکار [ئیسرائیل]، بۆ ئاوارەکردنەوەی فەلەستینییەکان، پووچەڵ بکەنەوە."
رۆژی سێشەممە، سەرکردەکانی وڵاتانی عەرەبی لە قاهیرە کۆبوونەوەیەکی نائاساییان کرد تایبەت بە دۆخی غەززە و ئاشکراکردنی پلانی میسر بۆ کەرتی غەززە لەدوای جەنگە 15 مانگییەکە.
لە بەیاننامەکەی حەماس دا هاتووە، داخستنی دەروازەکانی کەرتی غەززە بۆ سێیەم رۆژ لەسەریەک و رێگرتن لە گەیشتنی هاوکارییەکان، ئاماژەیەکی روونی پێشێلکاریی زایۆنییەکانە بەرامبەر بە رێککەوتنی ئاگربەست و تاوانێکی زەقی جەنگیشە.
ئەمە لەکاتێکدایە میسر پێشنیازێکی بۆ بنیاتنانەوەی کەرتی غەززە بە بڕی 53 ملیار دۆلار کردووە. پلانەکەی میسر لە سێ قۆناخ پێکهاتووە و بۆ ماوەی سێ بۆ پێنج ساڵە. قۆناخی یەکەم بۆ شەش مانگە و سەرنج لەسەر لابردنی داروپەردوو و ئاوەدانکردنەوەی سەرەتایی کەرتەکە دەبێت. قۆناخی دووەم بریتی دەبێت لە بەڕێوەچوونی کۆنفرانسێکی نێودەوڵەتی بۆ داڕشتنی پلانێکی پڕ لە وردەکاریی لەبارەی ئاوەدانکردنەوەی تەواوی کەرتەکە. قۆناخی سێیەمیش بریتی دەبێت لە پلاندانان و دروستکردنی یەکەی نیشتەجێبوون و یەکە پەروەردەیی و تەندروستییەکانی غەززە.
هەروەها بەگوێرەی رەشنووسی پلانەکەی میسر، ئیدارەدانی کەرتی غەززە لەدەست بزووتنەوەی حەماس نابێت، کە یەکێکە لە مەرجەکانی ئەمریکا و ئیسرائیل و بڕیاریشە پلانەکە لەچەند هەفتەی داهاتوو رادەستی دۆنالد ترەمپی سەرۆکی ئەمریکا دەکرێت.
لەساڵی 2007وە حەماس ئیدارەی غەززەی لەدەستە.
میسر پێشنیازی کردووە، کۆمیتەیەکی سەربەخۆ و تەکنۆکراتی فەلەستینی بەشێوەیەکی کاتی بۆ ماوەی شەش مانگ کەرتی غەززە بەڕێوەببەن، ئەو کۆمیتەیەش "لەژێر چەتری دەسەڵاتی فەلەستینی لە کەناری رۆژئاوا" بێت، بەڵام ئەندامانی کۆمیتەکە، سەر بەو دەسەڵاتە نەبن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ