وێنەی منداڵەکە
رووداو - گەرمیان
محەممەد کامەران لە 42 هەفتەیی (واتە بە 10 مانگ و نیوی) لەدایکبووە. پێش لەدایکبوونی پزیشکەکان بە دایکییان گوتووە، "تەندروستیی جێگیرە و هیچ کێشەی نییە،" بەڵام گوێچکەکانی دروست نەبوون و دڵیشی لەلای راستەوەیە، دوای 28 رۆژ مانەوە لەژێر چاودێریی پزیشکدا، شەوی رابردوو دەوروبەری کاژێر 09:00 گیانی لەدەستدا.
کامەران جاسم، باوکی محەممەد دەڵێت، "رۆشتم دەرمان و شت بهێنم، کە هاتمەوە بینیم پزیشکەکان لەسەری کۆبوونەتەوە و باسی ئەویان دەکرد. منیش هاتمە سەرەوە و گوتم، چییە مەسەلە؟ گوتیان: هەردوو گوێچکەی نییە و دڵیشی لای راستەوەیە. منیش رێک وەستام، شوکری خوام کرد و گوتم، کاری خوایە."
ئەم خێزانە دوو کچی دیکەیان هەیە، تەمەنیان 13 و 18 ساڵە، هیچ کێشەیەکی تەندروستییان نییە.
سەمیرە رەزا، دایکی محەممەد دەڵێت، "وەکو هەر کەسێکی ئاسایی، سەردانی پزیشکم کردووە، بەڵام هیچیان پێنەگوتووم کە منداڵەکەم کێشەی هەبێت، سۆنەریشم کردووە و هیچ دەرنەکەوتووە. خۆیشم پرسیارم لە پزیشکەکان کردووە و لێم پرسین، تەندروستیی باشە؟ گوتیان، باشە و عەیبی نییە."
پزیشکەکان دەڵێن، ئەگەر پێش لەدایکبوونیش دەربکەوتایە کە دڵی لای راستە، هیچ چارەسەرێکی بۆ نەدەکرا تاوەکو دوای لەدایکبوون.
ڤیان عومەر، پزیشکی منداڵان ئاماژە بەوە دەکات، "لەبەر ئەوەی پێشووتر دایک و باوکەکە منداڵێکی لەو شێوەیان نەبووە، ئەگەر دایک و باوک منداڵێکی دیکەیان هەبێت و کێشەی دڵی هەبێت، دەکرێت لەکاتی دووگیانییەکە ئیکۆی دڵ بۆ دڵی منداڵەکە بکرێت و دەردەکەوێت کە کێشەی دڵی هەیە، بەڵام چونکە پێشوەخت نەیان بووە، تەنها سۆنەریان بۆ کردووە و لە سۆنەریش دەرناکەوێت."
بوونی دڵ لەلای راست نەخۆشییەکی سکماکییە و دوو جۆری هەیە، لە یەکێکیان تەنیا دڵ دەکەوێتە لای راست، وەکو محەممەد. لە جۆری دووەمدا دڵ و هەموو کۆئەندام و پێکهاتەکانی ناو سینگ و سک، لە شوێنی خۆیان نین و چەپ و راست دەبن.
بەپێی راپۆرتە پزیشکییەکان، لە جیهاندا وا دەخەمڵێندرێت، لە هەر 12 هەزار منداڵێک کە لەدایک دەبێت، یەکێکیان دڵی دەکەوێتە لای راستەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ