رووداو دیجیتاڵ
دوای نزیکەی دوو هەفتە لە بایکۆتکردنی ناوەندە تەندروستییەکان، پزیشکانی گەنج گەڕانەوە سەر کارەکانیان. نوێنەرێکی پزیشکانی پارێزگای سلێمانی دەڵێت: "پزیشکان گەڕاونەتەوە بەشە گەرمەکان و شەممەی داهاتوو دەگەڕێنەوە بەشە ساردەکانیش." بەڕێوەبەری تەندروستیی گەرمیانیش دەڵێت: "پزیشکانی گەنج گەڕاونەتەوە شوێنە گەرمەکان، بەڵام تاوەکو ئێستا بڕیاری گەڕانەوە بۆ شوێنە ساردەکان نەدراوە."
رۆژی سێشەممە، 26-09-2023، شڤان کوردە، نوێنەرێکی پزیشکانی سنووری پارێزگای سلێمانی بە تۆڕی میدیایی رووداوی گوت: "دوای وەرگرتنی مووچە، دەوام ئاسایی بووەتەوە. پزیشکانی ناو شار لەسەر کارن، بەڵام لە ناوەندە تەندروستییەکان نەگەڕاونەتەوە سەر کارەکان واتا ئەوانەی کە دەوامی نەخۆشیی ساردی تێدا دەکرێت و حاڵەتی فریاکەوتنی تێدا نییە."
بە گوتەی شڤان کوردە، پزیشکانی نیشتەجێ خولاو بایکۆتی نەخۆشخانە و فریاکەوتنەکانیشیان کردبوو، تەنیا چەند پزیشکێکی پایە بڵند لە فریاکەوتنەکان هەبوون. دەشڵێت: "ئێستا پزیشکانی نیشتەجێ خولاو گەڕاونەتەوە فریاکەوتنەکان و شوێنە گەرمەکان."
ئەو نوێنەرەی پزیشکانی سنووری پارێزگای سلێمانی گوتیشی: "رۆژی شەممە بەشی نەشتەرگەریی ساردیش دەستپێدەکەینەوە کە ئەو بەشە لە نەخۆشخانەکان راگیرابوون."
لە گەرمیانیش پزیشکان گەڕاونەتەوە بەشی فریاکەوتن و بەشە گەرمەکان، بەڵام تاوەکو ئێستا بڕیار لەبارەی گەڕانەوە بۆ بەشە ساردەکان نەدراوە.
سیروان محەممەد، بەڕێوەبەری گشتیی تەندروستیی گەرمیان رایگەیاند: "لە دوێنێوە کە مووچەی تەندروستی دابەشکرا سەردانی زۆربەی ناوەندە تەندروستییەکانم کردووە و لەگەڵ پزیشکان و بەرپرسانی تەندروستی کۆبوومەتەوە، ئەوەی هەیە بەشی فریاکەوتنەکان و منداڵبوون بە پزیشک و کارمەند هەمووی دەوام دەکەن و لەسەر کارن. پزیشکانی گەنج بایکۆتیان کردبوو ئەوانیش گەڕانەتەوە، بەڵام تەنیا لە شوێنە گەرمەکانن."
بەڕێوەبەری گشتیی تەندروستیی گەرمیان داوا لە پزیشکان دەکات بگەڕێنەوە سەر کارەکانیان و دەشڵێت: "پزیشکە گەنجەکان هێشتا لە شوێنە ساردەکان نابینرێن و بایکۆتیان کردووە، تاوەکو ئێستا لە مەڵبەندە تەندروستییەکان و نەخۆشخانەی گشتی کەلاریش کارناکەن. بۆ بڕیاری کۆتایی و گەڕانەوە بۆ سەرجەم ناوەندە تەندروستییەکان بە سەرجەم بەشەکانییەوە چاوەڕوانی وەڵامی کۆتایی سەندیکای پزیشکانن کە هەفتەی داهاتوو لەوبارەوە کۆدەبنەوە و بڕیاری کۆتایی دەدەن."
رۆژی 13ـی ئەیلوولی 2023، بەهۆی دواکەوتنی مووچەی مانگەکانی حەوت و هەشت، لە سەرجەم ناوەندەکانی تەندروستی، بنکە، مەڵبەند، سەنتەرە تەندروستییەکان، نەخۆشخانەکان و سەرجەم دامەزراوە تەندروستییەکان لە سنووری سلێمانی و هەڵەبجە بایکۆت راگەیێندرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ