رووداو دیجیتاڵ
بەڕێوەبەرایەتیی بەرەنگاربوونەوەی تووندوتیژیی دژی ئافرەتان و خێزان لە هەولێر رایگەیاند، ئەمڕۆ سێ منداڵ لەلایەن باپیریانەوە لەسەر شەقام فڕێدراون کە یەکێکیان تەمەنی تەنیا پێنج مانگە.
رۆژی یەکشەممە، 25-06-2023، بەڕێوەبەرایەتیی بەرەنگاربوونەوەی تووندوتیژیی دژی ئافرەتان و خێزان لە هەولێر لە راگەیێندراوێکدا گوتی، لەلایەن پۆلیسی فریاکەوتنی هەولێر، سێ منداڵ کە دوویان کوڕن و تەمەنیان 9 بۆ 10 ساڵە و یەکێکیان کچە و تەمەنی پێنج مانگە، لە گەڕەکی نووسەرانی شاری هەولێر لە سەر شەقام فڕێدرابوون.
بەرەنگاربوونەوەی تووندوتیژیی دژی ئافرەتان و خێزان لە هەولێر دەڵێت، منداڵەکان بردراونەتە نووسینگەی منارەی بەڕێوەبەرایەتییەکەیان و دوای ئەوەی پەڕاوی لێکۆڵینەوە کراوەتەوە، دەرکەوتووە ئەو منداڵانە پێش ماوەیەک باوکیان دەستگیرکراوە و دایکیشیان لەلای باپیری منداڵەکان (باوکی هاوسەرەکەی) بەجێی هێشتوون و ئەمڕۆ باپیریان ئەوانی هێناوە و لەسەر شەقام فڕێیداون.
بەپێی راگەیێندراوەکەی بەڕێوەبەرایەتیی بەرەنگاربوونەوەی تووندوتیژیی دژی ئافرەتان و خێزان لە هەولێر، پەڕاوی لێکۆڵینەوە لەبارەی ئەو سێ منداڵە پێشکێشی دادوەری تووندوتیژیی خێزانی کرا و بڕیاریداوە دوو منداڵە کوڕەکان بۆ خانەی نەوجەوانانی هەولێر ببرێن و منداڵە کچە پێنچ مانگەکەش بۆ خانەی چاودێریی منداڵان لە ناو نەخۆشخانەی لەدایکبوونی هەولێر ببرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ