لە هێرشێکی درۆنیدا لە حەسەکە بەڵێندەرێکی ئەمریکی دەکوژرێت و پێنج سەربازیش بریندار دەبن

 

وەزارەتی بەرگریی ئەمریکا لە راگەیێندراوێکیدا ئاماژەی بەوەداوە، رۆژی پێنجشەممە، کاژێر 01:38 خولەکی پاشنیوەڕۆ بە درۆنێک هێرشکراوەتە سەر هێزەکانی وڵاتەکە لە بنکەیەکی سەربازیی ئەمریکا لە حەسەکە و بەهۆیەوە بەڵێندەرێکی ئەمریکی کوژراوە و پێنج سەرباز و بەڵێندەرێکی دیکەی ئەمریکی برینداربوون.

 

بەپێیی زانیارییە هەواڵگرییەکانی ئەمریکا، درۆنەکە لەلایەن ئێرانەوە دروستکراوە. 

 

سوپای ئەمریکا لە وەڵامی ئەو هێرشەدا، دەستبەجێ هێرشێکی ئاسمانی بۆسەر ژمارەیەک گرووپی چەکدار لە سووریا ئەنجامداوە. لوید ئۆستن، وەزیری بەرگریی ئەمریکا لە راگەیێندراوەکەی وەزارەتی بەرگریدا دەڵێت، "لەسەر فەرمانی سەرۆک بایدن، دەسەڵاتم بە فەرماندەیی ناوەندیی هێزەکانی ئەمریکا دا ئەمشەو هێرشێکی ورد لە رۆژهەڵاتی سووریا لە دژی ئەو بنکانە ئەنجامبدەن کە لەلایەن ئەو گرووپانەوە بەکارهاتوون کە سەر بە سوپای پاسدارانی ئێرانن.''

 

وەزیری بەرگریی ئەمریکا ئاماژەی بەوەداوە، ''هێرشەکە لە وەڵامی هێرشەکەی ئەمڕۆ [رۆژی پێنجشەممە] و، ئەو زنجیرە هێرشانەی ئەم دواییەن کە بۆسەر هاوپەیمانان لە سووریا لەلایەن ئەو گرووپانە کراون کە سەر بە سوپای پاسدرانی ئێرانن.''

 

بەپێی راگەیێندراوەکەی وەزارەتی بەرگریی ئەمریکا، مەبەست لە هێرشەکە بەرگریکردن و پاراستنی هێزەکانی ئەمریکایە لە ناوچەکە. هەروەها ئەوەش هاتووە ''وەک سەرۆک بایدن بە روونی گوتوویەتی، ئێمە هەموو رێکارێکی پێویست دەگرینەبەر بۆ پارێزگاریکردن لە خەڵکەکەمان و هەروەها هەمیشە لە شوێن و کاتێک کە خۆمان دەستنیشانی دەکەین، وەڵاممان دەبێت.''

 

لەبارەی رەوشی سەربازە بریندارەکان، وەک وەزارەتی بەرگریی ئەمریکا ئاماژەی پێکردووە، برینی دوو سەربازیان لە شوێنی رووداوەکە چارەسەرکراوە و سێ لە سەربازە بریندارەکانی دیکە و بەڵێندەرەکەش بەهۆی سەختیی برینەکەیانەوە گوێزراونەتەوە بنکەیەکی تەندروستیی هاوپەیمانان لە عێراق.  

فلیپ ڤێنتورا، گوتەبێژی وەزارەتی بەرگریی ئەمریکا بە رووداوی راگەیاند: تەندروستیی سەرباز و بەڵێندەرە بریندارەکان کە گوێزراونەتەوە بۆ عێراق، جێگیرە.