رووداو دیجیتاڵ
وەزارەتی کار و کاروباری کۆمەڵایەتی، سکاڵای یاسایی دژی حاکم ناز نووری، داواکاری پێشوو لە دادگەی سلێمانی تۆمار دەکات کە رایگەیاندبوو، "ئەو ژنانەی بە تۆمەتی لەشفرۆشی حوکم درابوون شەوان لە زیندانەکە براونەتە دەرەوە و کاری سێکسییان پێکراوە." وەزیری کاروبای کۆمەڵایەتیش دەڵێت، "رێکاری پێویست دەگیرێتەبەر، چونکە ئەو گوتانەی باسی دەکات ئێستا لەنێو چاکسازییەکان نەماوە."
حاکم ناز نووری، داواکاری گشتیی پێشوو لە دادگەی سلێمانی لە بەشێکی دیدارێکی رۆژنامەڤانیدا کە 14ـی ئەم مانگە (دامەزراوەی میدیایی درەو) بڵاویکردووەتەوە و دەڵێت، "لە ساڵانی 1999 – 2000، لەنێو چاکسازیی گەوراندا ئافرەتی تێدابوو کە بەهۆی لەشفرۆشییەوە حوکم درابوو؛ ئێمە کە دەچووین بۆ زیندان قسەمان لەگەڵ دەکردن، رۆژێک یەکێک لەوانەی لە زینداکە بوو گوتی؛ ئێمە زۆر بێزارین. گوتمان بۆچی؟ گوتی زۆرجار بە شەوان دێن دەمانبەن کاری سێکسییمان پێدەکەن. لە زیندانەکاندا ئەمڕۆ شتی زۆر سەیر و سەمەرەی زیاتر لەوە روودەدات."
"هیچ تاوانێکم نەکردووە و دەچمە دادگە"
حاکم ناز نووری، رۆژی دووشەممە، 19-12-2023، قسەی بۆ تۆڕی میدیایی رووداو کرد و گوتی، "پەیامەکەی بە هەڵە گەیێندراوە و ئەوەی باسی کردووە ساڵی 2000 بووە کە ئافرەتێک لەنێو چاکسازی گەوران پێی گوتووە، بێزارن و شەوان دەیانبەنە دەرەوە."
حاکم ناز نووری گوتیشی، "بەگوێرەی یاسا، ئەو ئافرەتە ئەگەر نووسراوێکی پێنەدابام، نەمدەتوانی هیچی بۆ بکەم، ئەویش نەیدەتوانی نووسراوم بۆ بکات و گوتی، ناتوانم، چونکە لە چاکسازی دەژیم و دەترسم عەزێتم بدەن، بەڵام کە گەڕامەوە سەرووی خۆم ئاگادارکردەوە بۆ ئەوەی وەزیری ئەوکاتی کاروباری کۆمەڵایەتی ئاگادار بکرێتەوە."
بە گوتەی حاکم ناز، ئەوەی باسی کردووە لە سەردەمی کاری خۆیدا بووە و ئێستا نازانێت چاکسازییەکان چۆنن و "ئێستا لەوانەیە زۆر خراپتربێت" و دەشڵێت، "ئەو قسەیەشم پاڵپشت بە قسەکانی کوێستان خان، وەزیری کاروباری کۆمەڵایەتییە کە لە دامەزراوەی میدیایی فەرمی حیزبەکەی خۆی لە 2022 دەڵێت، درۆن هەبوو تلیاکی دەگواستەوە، ژوور بۆ کاری نەشیاو و بەدرەوشتی دروستکراوە. ژووری ڤی ئای پی بۆ کەسە مافیاکان هەیە."
لە هەرێمی کوردستاندا سێ چاکسازیی گەوران لە شارەکانی هەولێر، سلێمانی و دهۆک هەن کە تایبەتە بە پیاوان؛ هاوکات سێ چاکسازیی ژنان و منداڵان لە هەر سێ شارەکەدا هەن. حاکم ناز نووری لە گوتەکانی دەڵێت، "ئەو ژنە لە چاکسازیی گەوران بووە." لەوبارەوە گوتی، "جاران چاکسازیی گەوران هەبوو لە شوێنی بنکەی گرتن و گواستنەوەی ئێستا کە لەنێو ئەو بینایە چاکسازیی ژنان و منداڵان هەبوو، واتا یەک شوێن بوو و بەش بەش جیاکرابوونەوە."
لەبارەی بوونی بەڵگە لەسەر گوتەکانی ئەو حاکمە دەڵێت، "بەڵگەی کاری سێکسی جگە لە خودا کەس ناتوانێت تۆماری بکات، دەبێت بەرژەوەندی ئەو خانمەی بڵێت دەستدرێژیم کراوەتەسەر چی بێت؟"
"ئەو کارانەی لەنێو چاکسازییەکان هەبوون، ئێستا نەماون"
کوێستان محەممەد، وەزیری کار و کاروباری کۆمەڵایەتی هەرێمی کوردستان لەبارەی گوتەکانی حاکم ناز نووری بە تۆڕی میدیایی رووداوی گوت، "رێکاری پێویست بەرامبەر گوتەکانی دەگرینەبەر، چونکە هەموو ئەو گوتانەی ئەو باسی دەکات گوایە من گوتوومە، پێشتر بوون نەک ئێستا، دوای ئەوەی لە 2019 ئێمە دەستمان بەکار کردووە لەسەر هەموو ئەو دۆسیانە کارمان کردووە و ئێستا نەماون."
فوئاد جەزا کەریم، بەڕێوەبەری چاکسازیی ژنان و منداڵانی سلێمانی بە تۆڕی میدیایی رووداوی گوت، "سکاڵای ئێمە لەسەر ئەوەیە کە دەڵێت، دڵنیام ئێستا لە چاکسازییەکان شتی زۆر خراپتر و سەیروسەمەرەتر هەیە، ئیتر نازانین سەیروسەمەرەتر جگە لە دەستدرێژیی سێکسی دەبێت چی بێت؟ سزادراوەکان و کارمەندەکانیش ناڕازی بوون لەو گوتانەی کە بڵاوکراوەتەوە."
بەگوتەی بەڕێوەبەری چاکسازیی ژنان و منداڵانی سلێمانی، کارمەندان و سزادراوانی نێو چاکسازیی سلێمانی و کەسوکارەکانیشیان بە گومانەوە پرسیاریان لەبارەی بڵاوبوونەوەی ئەو گوتانە کردووە. دەشڵێت، ئەوان داوایان لە وەزیری کاروباری کۆمەڵایەتی کردووە بێتە سەر هێڵ و لیژنەیەک سەردانی چاکسازییەکان بکەن بۆ بەدواداچوون لەو گوتانە، ئەگەر راستە ئیجرائاتی یاسایی بکرێت لەگەڵ ئەوانەی ئەو کارانەیان کردووە و ئەگەریش نەکراوە ئەوە دەبێت ئەو کەسەی قسەکەی کردووە باجەکەی بدات.
حاکم ناز نووری لەبارەی شوێنی سکاڵاکەی گوتی، "من لە سلێمانیم و دانیشتووی ئەو شارەم و شوێنی رووداوەکە سلێمانییە، بۆیە دەبێت سکاڵاکە لە سلێمانی بێت و لێرە دەچمە دادگە."
فوئاد جەزا دەشڵێت، "لەبەر ئەوەی ئەو خانمە دادوەر بووە، دەبێت لە وەزارەتی داد لە هەولێر سکاڵا تۆمار بکرێت، بۆیە وەزارەت یاخود بەڕێوەبەرایەتیی گشتیی چاکسازییەکان بە تۆمارکردنی سکاڵاکە هەڵدەستن و لە هەولێر دەبێت، چونکە ئەو لە گوتەکانی باسی سەرجەم چاکسازییەکان دەکات نەک تەنیا سلێمانی."
بەپێ زانیارییەکانی رووداو، دوای ئەوەی چاکسازیی ژنان و منداڵانی سلێمانی نووسراویان بۆ بەڕێوەبەری گشتیی چاکسازییەکانی هەرێمی کوردستان کرد، بڕیارە چوارشەممە داواکارییەکە بەرزبکرێتەوە و سکاڵاکە تۆمار بکرێت.
تاوەکو 11ـی ئەم مانگە، لەنێو هەر شەش چاکسازییەکانی هەرێمی کوردستان پێنج هەزار و 418 سزادراو هەبوون کە هەزار و 180 سزادراو بەکارهێنەر و بازرگانی مادەی هۆشبەر و 520ـیان بازرگان و 660ـیان بەکارهێنەرن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ