لە کفری 26 منداڵی دووانە لە قوتابخانەیەکدا دەخوێنن

نه‌رمین وه‌لی دایكی ئه‌نه‌س و یوسف ـە و دەڵێت "خۆیشمان بەتەواوی لەیەکدییان جیا ناکەینەوە، ئەگەر شتێک بۆ یەکێکیان بکەی دەبێت بۆ ئەوی دیکەیشیان بکەی. بەهۆی قژی پشت سەریانەوە لێکیان جیادەکەینەوە".

 

منداڵەکان هەر یەکە و باسی ئەو خاسییەتانە دەکات کە خێزانەکانیان ئەوانی پێ جیادەکەنەوە. یەکێک لە منداڵەکان دەڵێت "خوشکەکەم لە وانەی بیرکاری لاوازە، بەوە جیاماندەکەنەوە". 

 

منداڵێکی دیکە باس لەوە دەکات بەهۆی نووسینەوە دایک و باوکیان لێکیان جیادەکەنەوە، بەوپێیەی ئەو بەدەستی چەپی دەنووسێت و براکەی بە دەستی راست. 

 

هەڵسوكەوتی دووانەكانی ئەو قوتابخانەیە هەندێك جار لای مامۆستاكان دەبێتە جێگەی قسەو باس و دڵخۆشن قوتابخانەكەیان بەهۆی دووانە لێكچووەكانەوە نێوبانگی دەركردووە. 

 

لەڕووی زانستییەوە، یەک لەسەر سێی دووانەکان لەیەکچوون، دوو لەسەر سێیان لەیەکچوو نین، دووانەی لەیەکچوو لە یەک هێلکە دروستدەبن و دواتر لەگەڵ تێپەڕبوونی کات دەبێتە دوو کۆرپەی جیاواز کە لەیەکدی دەچن، بەڵام دووانەی لەیەک نەچوو ئەوانەن کە لە دوو هێلکەی جیاواز دروستدەبن و دوو سپێرم دوو هێلکە دەپیتێنن.