رووداو دیجیتاڵ
سەرۆک بارزانی پێشوازیی لە باڵیۆزی ئەمریکا لە عێراق کرد و رایگەیاند، "پارتی بایكۆتی هەڵبژاردنی نەكردووە" و "دەستی نامۆ و دەرەکی خرانە ناو هەڵبژاردن."
رۆژی چوارشەممە 20ی ئاداری 2024 لە سەلاحەدین سەرۆك مەسعود بارزانی پێشوازیی لە ئەلینا رۆمانۆوسکی، باڵیۆزی ئەمریکا لە عێراق كرد و جگە لە پیرۆزبایی نەورۆز تاوتوێی چەند بابەتێکی پەیوەست بە هەڵبژاردن و بڕیارەکەی مەکتەبی سیاسیی پارتی لەبارەی بایکۆتی هەڵبژاردن کرد.
بەپێی راگەیێندراوی بارەگای بارزانی، لە دیدارەكەدا باڵیۆزی ئەمریکا وێڕای ئاماژەدان بە بارودۆخی سیاسیی عێراق و هەرێمی كوردستان و دوا پێشهاتەكان، "نیگەرانیی خۆی و وڵاتەكەی لە دوا پێشهاتە سیاسییەكان دەربڕی و داواشی كرد، پارتی دیموكراتی كوردستان رۆڵی خۆی ببینێت و لەگەڵ لایەنەكانی دیکە پێكەوە كێشە و نیگەرانی و تێبینییەكانی پەیوەست بە هەڵبژاردنەكانی هەرێمی کوردستان چارەسەر بكەن."
سەرۆك بارزانی ئەوەی دووپات کردووەتەوە، "پارتی بایكۆتی هەڵبژاردنی نەكردووە، بەڵكو لەگەڵ هەڵبژاردنێكی پاك و بێگەرد و شەفاف و جێگەی دڵنیایی و دوور لە دەستوەردانی دەرەكی و بەرنامەی پێشوەختەیە، كە تێیدا دەنگدەران لە مافی دەنگدان بێبەش نەكرێن و پڕۆسەی دیموكراسی بێ بەها نەكرێت و یاساکانی هەرێمی کوردستان پێشێل نەکرێن."
لەبارەی پەیوەندییەکانی نێوان هەولێر و بەغدا، سەرۆک بارزانی ئەوەی خستووەتەڕوو، "رێككەوتنێكی روون و هەمەلایەنە لەگەڵ چوارچێوەی هەماهەنگی لەژێر ناوی ئیئتیلافی دەوڵەت هەیە، كە بەداخەوە هیچ یەك لە خاڵە گرنگەكانی ئەو رێككەوتننامەیە جێبەجێ نەكراوە. رێككەوتنەكە لەپێناو ئەوە بوو كە سەقامگیری بێتەدی و خەڵك بگاتە خوشگوزەرانی و بنەماكانی شەراكەت و تەوازون و تەوافوق پیادە ببن، بەڵام هیچ یەك لەمانە نەكران." جەختیشی لەوە کردووەتەوە، لە راوێژ و هەماهەنگیی بەردەوامدا دەبن بۆ چارەسەركردنی كێشەكان و نەهێشتنی نیگەرانییەكان.
لەو دیدارەدا سەرۆك بارزانی ئاماژەی بە هۆكارەكانی دەرچوونی بەیاننامەكەی پارتی دیموكراتی كوردستان دا و ئەوەی بۆ شاندی میوان روونکردەوە، "هەر لە سەرەتای نەوەدەكانی سەدەی رابردووەوە پارتی دەستپێشخەری بەڕێوەچوونی هەڵبژاردن بووە و خۆی لە ساڵی 1991 داوای كردووە كە پێویستە شەرعیەتی شۆڕشگێڕی جێگەی خۆی بداتە شەرعیەتی دەستووری و هەڵبژاردن بكرێت."
وەکو سەرۆک بارزانی دەڵێت، "پارتی هەمیشە لەگەڵ ئەنجامدانی هەڵبژاردن بووە، ترسی لە هەڵبژاردن نییە، بەڵكو تێبینیی لەسەر شێوازی هەڵبژاردن و مەترسیی تێكدانی بنەماكانی پێكەوەژیان و نەهێشتنی بەشداریی پێكهاتەكان لە ژیانی سیاسیدا هەیە."
هەروەها ئەوەشی خستووەتەڕوو، "بە بیانووی جۆراوجۆر، دوو ساڵ هەڵبژاردنیان دواخست، دەستی نامۆ و دەرەكی خرانە ناو ئەو بابەتە و لە بەها و پێگەی هەرێمی کوردستانیان كەم كردەوە. بە شێوەیەکی نادەستوری و نایاسایی بڕیار و یاساکانی هەرێمی کوردستانیان گۆڕی و ستەمێکی گەورەیان لە پێكهاتەكان و تێكڕای خەڵكی كوردستان كرد."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ