بەرەی تورکمانی دژی دانانی قایمقامی نوێی خورماتووە

 

رۆژی سێشەممە، 17ـی ئەیلوولی 2024، ئەنجوومەنی پارێزگای سەڵاحەدین بە کۆی دەنگ دکتۆر زوڵفەقار حەسەن سەلمانی بە قایمقامی خورماتوو لە شوێنی د. حەسەن زەینەلعابدین دانا، کە ئەوەی دووەمیان بەهۆی تەمەنییەوە خانەنشین کرا.

 

قایمقامی خورماتوو تورکمانێکی شیعەیە. لقی پارێزگای سەڵاحەدینی بەرەی تورکمانیی عێراق لە راگەیێندراوێکدا نیگەرانیی خۆی لە دیاریکردنی قایمقامی قەزای خورماتوو دەربڕی و رایگەیاند: "نیگەرانین و سەرمان سوڕماوە لە بڕیارەکەی ئەمدواییە بۆ دیاریکردنی قایمقامێکی نوێ بۆ قەزای دوزخورماتوو بەبێ راوێژکردن لەگەڵ هێز و کەسایەتییە کاریگەرەکانی ناوچەکە.

 

بەرەی تورکمانی پێیوایە، "سەقامگیری"ـی ساڵانی رابردوو بەهۆی هاوئاهەنگی و راوێژی لایەنەکانی بوو، "بەڵام ئەم هەنگاوەی ئێستا ئەو یەکگرتووییە کۆمەڵایەتییە لاواز دەکات و  پاشەکشە بە متمانەی هاووڵاتیان بە دامەزراوەکانیان دەکات."

 

بەرەی تورکمانی لە راگەیێندراوەکەیدا لەگەڵ ئەوەی بە پێویستی دەزانێت لە بڕیارە چارەنووسسازەکاندا لایەنە کاریگەرەکان هاوئاهەنگییان هەبێت، دەشڵێت: "ئێمە دژی ئەو کەسە نین بۆ ئەو پۆستە دیاریکراوە، لە خێزانە رێزدارەکانی ناوچەکەیە، بەڵام پێمانوایە دەبێت لە بەربژێرکردن بۆ ئەو جۆرە پۆستە هەستیارانە بە راوێژی هەمووان بێت و هاوئاهەنگی و گۆڕینەوەی بیروڕا هەبێت، بۆ ئەوەی هەمووان پشتیوانی لەو کەسانە بکەین کە بۆ بەرپرسیارێتییەکان رادەسپێردرێن لەپێناو سەرخستنیان."

 

بەرەی تورکمانی بەرپرسیارێتیی ئەوەی بە "پەراوێزخستنی رۆڵی تورکمان لە دوای ساڵی 2013ـەوە"ناوی بردووە، دەخاتە ئەستۆی پارێزگای سەڵاحەدین و دەڵێت: "چاوەڕوانین ئەو پێگەیەی پێویستە و شایستەیە بدرێت بە تورکمان لە بەڕێوەبردنی پارێزگای سەڵاحەدین."

 

قایمقامە نوێیەکەی قەزای خورماتوو پێشتر بەڕێوەبەری چاودێریی تەندروستی بووە لە بەڕێوەبەرایەتیی تەندروستیی پارێزگای کەرکووک.

 

17ـی ئاداری 2024 ئەنجوومەنی پارێزگای سەلاحەدین کۆبووەوە و بە 13 دەنگ بەدر مەحموود فەحلی، وەک پارێزگاری نوێی سەلاحەدین هەڵبژارد.