کوردستان
دوایین خاڵی سەربازیی پاسەوانی سنووریی عێراق لە دەڤەری مزووری باڵا. وێنە: هەژار جەوهەر - رووداو
رووداو دیجیتاڵ
گوتەبێژی ناوچەی یەکی پاسەوانی سنوور دەڵێت، لە هەرێمی کوردستان تەنیا 900 کەس بۆ پاسەوانی سنوور ناویان گەڕاوەتەوە و لیژنەیەک لە بەغداوە هاتوون و سێ رۆژە چاوپێکەوتنیان لەگەڵ دەکەن و بڕیارە ئەمڕۆش لیژنەکە کارەکانی تەواو بکات.
رۆژی 14ـی ئەم مانگە، وەزارەتی ناوخۆی عێراق لە رێگەی کورتەنامەیەکەوە ئەو کەسانەی ئاگادار کردەوە کە ناویان بۆ پاسەوانی سنوور گەڕاوەتەوە.
رۆژی چوارشەممە 19-07-2023، عەقید کاروان خۆشناو، گوتەبێژی ناوچەی یەکی پاسەوانی سنوور بە تۆڕی میدیایی رووداوی گوت، "900 کەس ناویان بۆ پاسەوانی سنوور لە هەر سێ پارێزگای سلێمانی، هەولێر و دهۆک گەڕاوەتەوە کە بڕیارە وەکو پاسەوانی سنوور دابمەزرێن. ئەو 900 کەسە ئەوانەن کە فۆرمیان پڕکردووەتەوە و کۆدیان بۆ هاتووەتەوە."
بەگوتەی گوتەبێژی ناوچەی یەکی پاسەوانی سنوور، "بۆ ئەوەی ئەو کەسانەی ناویان هاتووەتەوە بۆ چاوپێکەوتن سەردانی بەغدا نەکەن، لیژنەیەک لە بەغداوە هاتووە و بڕیارە ئەمڕۆ دوای سێ رۆژ کارکردن، لیژنەکە کارەکانی تەواو بکات و بگەڕێتەوە."
لەبارەی رێکارەکانی دامەزراندنی ئەو 900 کەسە وەک پاسەوانی سنوور، کاروان خۆشناو گوتی، "هێشتا دیار نییە رێکارەکان چۆنن؛ جارێ تەنیا چاوپێکەوتنیان لەگەڵ کراوە و دەبێت چاوەڕێ بین لیژنەکە کارەکانیان تەواو بکات."
17ـی کانوونی دووەمی 2023 عەقید کاروان خۆشناو بە رووداوی گوت، بڕیارە بۆ عێراق بە گشتی شەش هەزار و بۆ هەرێمی کوردستان 2600 کەس بۆ پاسەوانی سنوور دابمەزرێن.
دامەزراندنی ئەو هاونیشتمانییانە تایبەتە بە ناوچەی یەکی پاسەوانی سنوور کە پارێزگاکانی هەولێر، دهۆک و سلێمانی و هەڵەبجە بە درێژایی نزیکەی هەزار و 30 کیلۆمەتر دەگرێتەوە.
مەرجەکانی دامەزراندنەکە بریتی بوون لە: کەسەکە دەبێت تەمەنی لەنێوان 17 ساڵ بۆ 35 ساڵ بێت، لە دایک و باوکێکی عێراقی بێت، فۆرمەکە بە زمانی عەرەبی پڕبکاتەوە و تەنیا پێویستە بڕوانامەی سەرەتایی و دواناوەندیی هەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ