​کۆمیسیۆن: رێژەی بەشداری لە دەنگدانی تایبەت 96.6% بووە

 

 

کۆمیسیۆنی باڵای سەربەخۆی هەڵبژاردنەکانی عێراق رایگەیاند، لە دەنگدانی تایبەت بۆ هەڵبژاردنی خولی شەشەمی پەرلەمانی کوردستان، 208 هەزار و 521 کەس دەنگیان داوە، کە 203 هەزار و 773 کەسیان نێر و چوار هەزار و 748 کەسیان مێ بوون.

 

لە دەنگدانی تایبەت بۆ هەڵبژاردنی پەرلەمانی کوردستان 215 هەزار و 960 کەس مافی دەنگدانیان هەبووە و دەنگدەران لە 165 بنکە و 749 وێستگە دەنگیان داوە، ئەمەش بەپێی ئامارەکانی کۆمیسیۆن.

 

بەپێی ئامارەکەی کۆمیسیۆن بێت، رێژەی بەشداریکردنی هێزە ئەمنییەکان لە دەنگدانی تایبەت 96.6% بووە.

 

پێشتر حاکم عومەر، سەرۆکی کۆمیسیۆنی هەڵبژاردنەکانی عێراق بە رووداوی راگەیاند، رێژەیی بەشداریی لە هەموو کوردستان لە ئاستێکی زۆر بەرزدایە و زیاتر لە 90%ـە.

 

لەبارەی سکاڵاکان، حاکم عومەر گوتی، "بەگوێرەی یاسا مامەڵە لەگەڵ هەموو سکاڵاکان دەکەین و بەگشتیش پرۆسەکە بە باشی بەڕێوەچوو، ئەو گرفتە بچووکانەش کە هەبوون لە هەموو هەڵبژاردنێکدا هەر هەبووە و دەبێت."

 

کاژێر 07:00ی بەیانیی ئەمڕۆ دەنگدانی تایبەت بۆ خولی شەشەمی پەرلەمانی کوردستان دەستپێکرد و تاوەکو کاژێر 06:00ی ئێوارە بەردەوام بوو. جگە لە پارێزگای هەڵەبجە لە پارێزگاکانی دیکە دەنگدان بەشێوەیەکی ئاسایی بەڕێوەچوو. 

 

لە پارێزگای هەڵەبجە گرژی دروست بوو بەهۆی ئەوەی بەشێک لە هێزە ئەمنییەکان مۆبایلیان بردبووە ژوورەوە و وێنەی فۆرمی دەنگدانی خۆیان دەگرت.

 

کۆی گشتیی دەنگدەرانی تایبەت 215 هەزار و 960 کەسن کە دەکاتە رێژەی 7.4%ی کۆی دەنگدەران.

 

 

هیوا حسامەدین، نێردراوی رووداو لە رومادی رایگەیاند، لە دەنگدانی تایبەت لە بنکەی رومادی کە 196 کەس مافی دەنگدانیان هەبوو، تەنیا 15 کەس دەنگیان داوە.

 

بەپێی زانیارییەکانی رووداو، پارتی دیموکراتی کوردستان چوار دەنگ، یەکێتیی نیشتمانیی کوردستان سێ دەنگ، یەکگرتووی ئیسلامیی کوردستان سێ دەنگ، نەوەی نوێ یەک دەنگیان بەدەستهێناوە.

 

هەروەها بزووتنەوەی بابلیون و سەزگین موسڵیح عەلووش، بەربژێر بۆ کورسیی کۆتای سلێمانی، دەنگێکیان بەدەستهێناوە و دەنگێکیش پووچەڵ بووە.