سووتانی دارستانەکانی لجێی ئامەد. وێنە: رووداو
رووداو دیجیتاڵ
لە پارێزگای ئامەدی باکووری کوردستان ئاگر لە دارستانەکانی شارۆچکەی لجێ کەوتووەتەوە و بەو هۆیەوە 25 هێکتار دارستان سووتاوە.
ئاگرەکە شەوی دووشەممە، 17ـی تەممووزی 2023 لە دارستانەکانی دەشتی فیس لە شارۆچکەی لجێ کەوتەوە، بەهۆی ئاگرەکەوە شەش خانوو چۆڵکران و دوو کەسی بەساڵاچوو کە لە ئاگرەکەدا گیریان خواردبوو، رزگارکران.
بەگوێرەی زانیارییەکان، کاژێر 07:16 ـی شەوی دووشەممە سەربازەکانی سوپای تورکیا لە گوندەکانی قەرەحسان، حوسێنیگ، دێرخست و پیریک حەشیشیان سووتاندووە و دواتر ئاگرەکە بۆ کێڵگەکانی دەوروبەری تەشەنەی سەندووە.
لەگەڵ ئاگادارکردنەوەی تیمەکانی فریاکەوتن و بەرگری شارستانی و بەڕێوەبەرایەتی دارستان رەوانەی شوێنی رووداوەکە کراون.
بەهۆی ئاگرەکەوە 25 هێکتار دارستان سووتاوە و شەش ماڵ چۆڵکران و دوو کەسی بەساڵاچوو کە لەناو ئاگرەکەدا گیریان خواردبوو رزگارکراون.
بەهۆی بەهێزی باوە ئاگرەکە تەشەنەی سەندووە و کۆنتڕۆڵکردنی قورس بووە. بە هاوکاری خەڵکی ناوچەکە و تیمەکانی رەوانەی شوێنی رووداوەکە کراون، هەوڵەکان بۆ کۆنتڕۆڵکردنی ئاگرەکە بەردەوامن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ