لە سۆران تابووتێک دەدۆزرێتەوە کە ئێسکوپرووسکی کەسێکی تێدا بووە و مێژووەکەی بۆ 1800 ساڵ دەگەڕێتەوە

 

عوسمان ئیبراهیم، دانیشتووی گوندەکەیە، 31 ساڵ پێش ئێستا گۆڕەکەی دۆزیوەتەوە و پاراستوویەتی، دەڵێت، "ئێمە لە 92 و 93  هاتینەوە ویستمان ئێرە بکەینە خانوویەک، بەڵام گەیشتینە ئەو گۆڕە، کە گەیشتینە گۆڕەکە ئێسکەکە دیاربوو، وەڵڵا راست دامان پۆشییەوە پاش ئەوکاتە من دیوارێکم لەسەر کرد گوتم با هیچ کەسێک دەستکاری نەکات هەر پاراستم."

 

گۆڕە دۆزراوەکە ئێسک و پروسکی مرۆڤی تێدایە. تابووتەکە لە شێوەی بەلەمێک دەچێت. هێما و ئاماژەی سەر تابووتەکە تیمەکانی گەیاندووەتە ئەنجامی باش لەبارەی مێژوو، رەگەز و ئایینی ئەو کەسەی لەنێو تابووتەکەدا نێژراوە. گومان دەکەن کەسەکە لەکاتی مردنیدا تەمەنی 18 ساڵ بووبێت.

 

ئەلیسیا کلۆیدج، شوێنەوارناسی ئیسپانی بە رووداوی راگەیاند، "هەڵدانەوەی ئەم گۆڕە دەستکەوتێکی گەورەیە، چونکە توانیومانە شوێنەواری بەخاکسپاردنەوەی جاری دووەمی لاوێکی نێر بدۆزینەوە. شتێکی زۆر باشە، چونکە ئێرە شارۆچکەیەکی کریستیانەکانە. چەند شوێنەوار و ئاسەوارێکمان دەستکەوتووە کە ئەوە نیشان دەدەن و دوو خاچمان دۆزیوتەوە، یەکێک لەسەر سەری ئێسکوپرووسکەکە دانرابوو، ئەوەی دیکەش لێرە."

 

لە رابردوودا لە سۆران و دەوروبەری زۆر شوێنی دیکەی شوێنەواری دۆزراونەتەوە، بەڵام یەکەم جارە تابووتی لەوشێوەیە بە ئاماژە و هێمای ئایینی دەدۆزرێتەوە. عەبدولوەهاب سلێمان، بەڕێوەبەری شوێنەواری سۆران دەڵێت، تابووتی لەو شێوازە کە پەیڕەوی ئایینیی مەسیحیەت بێت، بۆ یەکەمجارە تەنانەت لەسەر ئاستی کوردستانی گەورەش دەدۆزرێتەوە.

 

لە سنووری ئیدارەی سەربەخۆی سۆران زیاتر لە هەزار و 100 شوێنی شوێنەواری تۆمارکراون، گەڕان و پشکنین بۆ دۆزینەوە و تۆمارکردنی شوێنی دیکەیش بەردەوامە.