سەرکردەیەکی داعش کە بەشداریی لە کۆمەڵکوژییەکەی سەربازگەی سپایکەر کردووە دەستگیرکرا

 

 

رۆژی پێنجشەمە 16ی نیسان، لە هەڵمەتێکی لیوای 61 و هێزە ئەمنییەکاندا ژمارەیەک گومانلێکراو دەستگیرکران، یەکێکیان سەرکردەیەکی داعش بووە، شایەتحاڵێک دەربارەی سەرکردەکەی داعش گوتی "پێویستە هێزە ئەمنییەکان لێکۆڵینەوە بکەن لەوەی کە کێیە و کێ نییە، من منداڵە بچووکەکانم بینیوە لەگەڵ ئافرەتەکان، پیاوێکیان هەر بە ماتۆڕ هاتووچۆی دەکرد".

 

ئەو سەرکردەیەی داعش خەڵکی پارێزگای سەڵاحەددینە و خۆی، برایەکی، سێ منداڵ و هاوژینەکەی خانووەکەیان بەکرێ گرتووە، پێشتر هەر لە کەرکووک لە گەڕەکی پەنجا عەلی نیشتەجێ بووە.

 

لوقمان عەلی، موختاری گەڕەک دەڵێ "ناوی لای ئێمە تۆمار نەکراوە، پێنج کەس بوون و خەڵکی سەڵاحەددین بوون، پرست پێناکەن، خانووی بەتاڵ هەبێت دەیدەنە کرێ و لێی ناکۆڵنەوە کێیە".

 

دەستگیرکردنی ئەو سەرکردەیەی داعش بووەتە سەرچاوەی گرنگ بۆ هێزە ئەمنییەکان و دانی بە بوونی چەندین گرووپی سەر بە داعشدا ناوە لە سنووری کەرکووک.

 

لیوا عەلی موتەشەر، جێگری بەڕێوەبەری پۆلیسی کەرکووک رایگەیاند "هێزەکانمان ئامادەن بە بەردەوامی بۆ گەڕان و پشکنینی هەر شوێنێک و دەستگیرکردنی هەر کەسێک، ئەو کەسانە لێکۆڵینەوەیان لەگەڵ دەکرێ و لە زیندان دەمێننەوە بەپێی بڕیاری دادوەری لێکۆڵینەوە".

 

چەند رۆژێکە هێزە ئەمنییەکانی کەرکووک کەوتوونەتە ئامادەباشییەوە و ژمارەیەک هێزی سەربازیی پۆلیسی فیدراڵی بە زرێپۆش و چەکی قورسەوە لەنێو شار جێگیرکراون.