رووداو دیجیتاڵ
گوتەبێژی پۆلیسی ئاکرێ رایگەیاند، ژنێک 14 هەزار و 700 دۆلاری بێ پرسی هاوژینەکەی بردووە و ئەویش سکاڵای لەسەر تۆمارکردووە و ژنەکەش لە هۆتێلێکی شاری هەولێر دەستگیرکراوە.
رۆژی دووشەممە 14-08-2023 موقەدەم عیماد حوسێن، گوتەبێژی پۆلیسی ئاکرێ بە تۆڕی میدیایی رووداوی راگەیاند، "پیاوێک هاتووەتە لای ئێمە سکاڵای تۆمارکردووە و دەڵێت، ژنەکەی بێ ئاگاداری ئەو لە ماڵ دەرچووە و بڕی 14 هەزار و 700 دۆلاری بردووە و چووەتە هەولێر."
بە گوتەی گوتەبێژی پۆلیسی ئاکرێ، "لەسەر بنەمای ئەو سکاڵایە، لەگەڵ بەڕێوەبەرایەتیی پۆلیسی پارێزگای هەولێر دەستمان بە لێکۆڵینەوە کرد و توانیمان شوێنی ئەو ژنە بدۆزینەوە کە لە هوتێلێکی شاری هەولێر بوو و دەستبەسەرکرا."
ژنەکە تەمەنی 28 ساڵە. موقدەم عیماد حوسێن دەڵێت، ئەو ژنە "ویستویەتی بچێتە ئەوروپا و دەڵێت، ئەو پارەیەی بردوویەتی بە کوڕێکی داوە بۆ ئەوەی بیبات بۆ ئەوروپا، بەڵام کوڕەکە فێڵی لێکردووە و بە هاوکاری کەسێکی دیکە 14 هەزار و 700 دۆلارەکەیان لێ بردووە."
بە گوتەی گوتەبێژی پۆلیسی ئاکرێ، "ئێستا ژنەکە و هەردوو کوڕەکەی دیکە کە پارەکەیان لێبردووە، دەستگیرکراون."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ