هۆڵێکی تاقیکردنەوەی توانستی زانستیی خوێندنی باڵا
رووداو دیجیتاڵ
لە زانکۆ حکومییەکانی هەرێمی کوردستان تاقیکردنەوەی توانستی زانستی بەڕێوەچوو؛ زیاتر لە 15 هەزار خوازیار، کێبڕکێ دەکەن بۆ بەدەستهێنانی حەوت هەزار 614 کورسی دیپلۆمی باڵا، ماستەر و دکتۆرا.
مامۆستا سۆزان، یەکێکە لەو خوازیارانە و لە زانکۆی سەلاحەدین بەشداری تاقیکردنەوەکەی کردووە، ئەو دوای ساڵانێک لە بەدەستهێنانی بڕوانامەی بەکالۆریۆس لە بیرکاری دەیەوێت لە هەمان بەش دیپلۆمی باڵا بەدەستبهێنێت.
سۆزان قادر، خوازیارێکە و دەڵێت: حەز و خولیای خۆم بوو کە بخوێنم و ئاستم بەرز بکەمەوە، ئیتر توانیم بەشداری بکەم و خزمەت بەخۆم و ئەو کەسانە دەکەم کە لەگەڵمان کار دەکەن.
لە کورسیەکانی خوێندنی باڵا بۆ ساڵی 2023 هەزار و 834یان بۆ بڕوانامەی دکتۆرا و سێ هەزار و 312 بۆ ماستەر و دیپلۆمی پزیشکی 160 کورسی و دیپلۆمی باڵا دوو هەزار و 308 تەرخانکراون.
ئارام محەممەد، وەزیری خوێندنی باڵا و توێژینەوەی زانستیی هەرێمی کوردستان بە تۆڕی میدیایی رووداوی گوت: 10 هەزار بەس مامۆستامان هەیە لەکاتی گفتوگۆکردن لەسەر بودجە لەگەڵ حکومەتی عێراق ناوی نزیکی هەزار خاوەن بڕوانامەی ماستەر و دکتۆرامان ناردووە کە دانەمەزراون.
وەک وەزارەتی خوێندنی باڵا دەڵێت، تەرخانکردنی کورسییەکان بەپێی راپرسی و داواکاری زانستی دیاریکراون و کوردستان پێویستی بەژمارەیەکی زیاتر لە بروانامەی خوێندنی باڵا هەیە، بۆ ئەوەی بتوانن پێداویستی وەزارەتەکان لە حکومەتی هەرێمی کوردستان پڕبکەنەوە.
ئارام محەممەد دەشڵێت: هەر حەوت هەزار کورسییەکە کە تەرخانکراون پێویستین بۆ دامودەزگەکانی حکومەت، چونکە هەمووی بەپێی پلان و پێویستی دانراون.
دوای دەرچوون لە تاقیکردنەوەی توانستی زانستی خوازیارانی بروانامە باڵاکان، کێبڕکێکەیان بەشێوازی خاڵ دەبێت کە توێژینەوەی زانستی و ساڵی خزمەت بۆیان هەژمار دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ