کوشتارگەی باوەنوور لە سنووری گەرمیان. وێنە: رووداو
رووداو - گەرمیان
مەحموود عەبدولقادر تەمەنی 70 ساڵە و زیاتر لە 30 ساڵە لە شارۆچکەی باوەنوور قەسابە؛ 15 رۆژە لەگەڵ هەموو قەسابەکانی دیکەی باوەنوور بەهۆی داخرانی کوشتارگەکەیانەوە ئاژەڵ سەرنابڕن.
ئەو قەسابەی باوەنوور دەڵێت، "هیچ ئیشێک نییە بیکەین، بژێویمان لەسەر ئەم ئیشەیە، ئەگەر ئەوان دایبخەن، ئیدی ئێمە هیچ شتێکمان نامێنێت، مەگەر بڕۆینەوە بۆ ماڵەوە و بۆ خۆمان دابنیشین."
بینای کوشتارگەی باوەنوورە لە ساڵی 2014 کراوەتەوە، تائێستا بەبێ نووسراوی شارەوانی کاری کردووە، بەڵام شارەوانیی گەرمیان سکاڵای لەسەر خاوەن کوشتارگەکە تۆمار کردووە.
شارەوانیی گەرمیان چاوەڕێی بڕیاری دادگەیە بۆ یەکلاییکردنەوەی خاوەندارێتیی کوشتارگەکە.
دڵشاد فەتاح، جێگری بەڕێوەبەری شارەوانیی گەرمیان رایگەیاند، "ئەو کوشتارگەیە لە ساڵانی پيشووتردا بە شێوەیەکی نایاسایی دروستکراوە، لە ساڵی 2023 نووسراوێکمان ئاراستەی ئەو خاوەن کوشتارگەیە کردووە، بۆئەوەی رادەستمان بکات و لێپێچینەوەی یاسایی لەگەڵدا بکەین، بەڵام ئەو کەسە رادەستی نەکرد و ئێمەش کەیسەکەمان رادەستی دادگە کردووە بۆئەوەی یەکلایی بکاتەوە."
حەوت قەساب لە باوەنوور رۆژانە زیاتر لە 15 سەر ئاژەڵ سەردەبڕن، نرخی گۆشت لە شارۆچکەی باوەنوور 2000 دینار کەمترە بەراورد بە ناوچەکانی دیکە، ئەوەش وایکردووە خواست لە سەری زۆر بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ