50 ژنی تووشبووی شێرپەنجە شاخەوانی دەکەن

 

 

50 تووشبووی دیکەش لەگەڵ بەیانن، وەرزش هیوای پێبەخشیوون و لەسەر پێی خۆیان دەڕۆن. 

 

بەیان حەمەساڵح، تووشبوویەکی پێشووی شێرپەنجە دەڵێت، لە سەرەتادا دەڕۆشتم و کەوتم بەڵام دواتر وردە وردە رۆشتمە سەر شاخی سورێن و سەر شاخەکانی تر. چوار ساڵ زیاترە زۆر باشم. "دکتۆرەکەم پێی وتم زەحمەتە تۆ بتوانیت لەسەر پێی خۆت بڕۆیت، سوپاس بۆ خودا ئەوەشم تێپەڕاند و ژیانێکی خۆشم هەیە." 

 

لە ساڵی 2013ـەوە کۆمەڵەی بەرەنگاربوونەوەی شێرپەنجەیان دامەزراند. سەرەتا 120 کەس بوون و تەندروستییەکی باشتر ئامانجیان بوو. 

 

شەهلا عەلی، سەرپەرشتیاری کۆمەڵەی بەرەنگاربوونەوەی شێرپەنجە گوتی، "ئامانجی سەرەکیمان هەوڵدانە بۆ ژیانێکی تەندروست، کە وەرزش دەکەیت مێشکت ئارام دەبێتەوە ژیانێکی ئاسایی دەبەیتەسەر." 

 

یەکێک لە رێنماییەکانی پزیشک بۆ ئەو ژنانەی دیاریکردووە وەرزشکردنە، بۆ جێبەجێکردنی ئەم رێنماییەش لە هەفتەیەکدا سێ رۆژ شاخەوانی و رێ رۆشتن دەکەن، رۆژێکیش مەلەوانی دەکەن، سێ رۆژەکەی دیکەی هەفتەش دەچنە سەنتەری وەرزشی بۆ راهێنان.

 

لەو سەنتەرەدا، جگە لە تووشبووانی شێرپەنجە ژنانی دیکەش هەن، کە شەکرە و بەرزی گوشاری خوێنیان هەیە. 

 

راهێنەرێک کە لە رۆژهەڵاتی کوردستان شێرپەنجەی مەمکی تێپەڕاندووە، ئێستا لە شاری سلێمانی راهێنان بە تووشبووانی شێرپەنجە دەکات.

 

هاوشان لەگەڵ دەرمانەکانیاندا، رێنمایی ئەو ژنانە دەکرێت، کە گرنگی بە وەرزش، خۆراکی تەندروست، دابەزاندنی کێش و پشکنینی بەردەوام بدەن.