رووداو دیجیتاڵ
بەگوێرەی داتاکانی دامەزراوەی ئاماری تورکیا ژمارەی بێکاران لە مانگی ئاداری ئەمساڵدا 19 هەزار کەس کەمیکردووە و ئێستا سێ ملیۆن و 57 هەزار کەس بێکارن.
دامەزراوەکە ئەمڕۆ هەینی 10ـی ئایاری 2024، داتاکانی پەیوەست بە بێکاری و هێزی کاری بۆ مانگی ئاداری 2024 بڵاوکردەوە.
بەگوێرەی داتاکان لە مانگی ئاداری ئەمساڵدا بە بەراورد بە مانگی شوبات ژمارەی بێکاران 19 هەزار کەس کەمیکردووە و بۆ سێ ملیۆن و 57 هەزار کەس دابەزیوە. رێژەی بێکاریش 0.1٪ کەمیکردووە و بووەتە 8.6٪.
رێژەی بێکاریی ئەوانەی تەمەنیان لە نێوان 15 بۆ 24 ساڵە، 0.4٪ کەمیکردووە و لە 15.6٪ەوە بۆ 15.1٪ دابەزیوە.
ئاماری بێکاریی دامەزراوەی ئاماری تورکیا بەپێی ئەو کەسانە هەژمار دەکرێت، کە بە فەرمی داواکارییان بۆ دەستەبەرکردنی کار پێشکەش کردووە و کاریان بۆ دابین نەکراوە.
ئەوانەی کە بە فەرمی داواکارییان پێشکەش نەکردووە لە ئامارەکانی ئەو دامەزراوەیە تۆمار ناکرێن. دامەزراوە سەربەخۆکان گومانیان لە ئامارەکانی دەستەی ئاماری تورکیا هەیە و دەڵێن ئەو ئامارانە راست نین.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ