رووداو دیجیتاڵ
گوتەبێژی بەڕێوەبەرایەتیی حەج و عومرەی هەرێمی کوردستان رایگەیاند، نرخی عومرە لە نێوان 475 بۆ 500 دۆلارە، بەهۆی زۆربوونی ژمارەی کۆمپانیاکانیش تادێت نرخەکەی زیاتر دادەبەزێت.
تاوەکو دوو مانگ لەمەوبەر، نرخی عومرە لەنێوان 550 بۆ 600 دۆلار بوو.
رۆژی پێنجشەممە 07-12-2023 کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە تۆڕی میدیایی رووداوی گوت، "بەهۆی رێکارەکانی بەڕێوەبەرایەتی گشتی حەج و عومرە نرخی عومرە تاوەکو دێت دادەبەزێت و ئێستا لە نێوان 475 بۆ 500 دۆلارە لەکاتێکدا لە چەند ساڵی رابردوو لە نێوان 900 بۆ 1000 دۆلار بوو".
بەگوتەی کاروان ستوونی، بەهۆی زیادبوونی ژمارەی کۆمپانیاکان کێبڕکێ لە نێوان کۆمپانیاکان زۆربووە و ئەوەش وایکردووە نرخی عومرە زیاتر دابەزێت. دەشڵێت، "هەر کەسێک فەرمانبەر نەبێت و پێشتر عومرەی کردبێت و بەگوێرەی چەند مەرجێکی دیکە، دەتوانێت داواکاری پێشکێش بکات و ببێتە خاوەنی کۆمپانیای عومرە".
گوتەبێژی بەڕێوەبەرایەتیی حەج و عومرەی هەرێمی کوردستان گوتیشی، پێشتر چونکە ژمارەی کۆمپانیاکانی عومرە دیاریکراوبوون ئەوە وایکردبوو هەر کۆمپانیایەک نرخێکیان دادەنا و خەڵک ناچار دەبوو بەو نرخە گەشتی عومرە بکات، بەڵام بەڕێوەبەرایەتییەکەیان لە ماوەی دوو ساڵی رابردوو ئەو کەسانەی خوازیاربوون کۆمپانیای عومرە دابنێن بەگوێرەی مەرجەکان رێگەپێدانیان بۆ کراوە، ئەوەش کاریگەری لەسەر نرخی عومرە هەبووە.
کاروان ستوونی گوتی، "لە مانگی 12 گەشت بۆ عومرە باشە، بەڵام وەکو پشووەکان نییە ئەوکاتانەی قوتابخانە دادەخرێت، چونکە ئەوکاتانە گەشتی عومرە زیاتر دەبێت".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ