رووداو دیجیتاڵ
نوێنەرێکی مامۆستایانی وانەبێژ رایگەیاند، ئەمڕۆ مووچەی مانگی نیسانی مامۆستایانی وانەبێژ لە سنووری پارێزگای سلێمانی دابەشدەکرێت.
هەفتەی رابردوو لە سنووری پەروەردەکانی هەولێر و دهۆک شایستەداراییەکانی مانگی نیسانی مامۆستایانی وانەبێژیان دابەشکران، تەنیا مامۆستایانی سنووری پارێزگای سلێمانی مووچەکانیان وەرنەگرت.
رۆژی سێشەممە، 06-06-2023 کارۆخ عەبدوڵڵا، نوێنەری مامۆستایانی وانەبێژ بە تۆڕی میدیایی رووداوی گوت: "کاژێر 10:00ـی ئەمڕۆ مامۆستایانی وانەبێژی سنووری پەروەردەکانی سلێمانی دەتوانن سەردانی بانکەکان بکەن و مووچەی مانگی نیسان وەربگرن."
بە گوتەی کارۆخ عەبدوڵڵا هەر ئەمڕۆ لە سنووری پەروەردەکانی هەڵەبجە، گەرمیان و راپەرینیش مامۆستایانی وانەبێژ مووچەی مانگی نیسان وەردەگرن.
بەگشتی، کەمترین مووچەی مانگانەی مامۆستایانی وانەبێژ 250 هەزار دینارە و زۆرترینیشیان 400 هەزار دینارە، بەڵام مووچەکانیان بەگوێرەی بڕوانامەکانیش دەگۆڕێت.
لە هەرێمی کوردستان نزیکەی 33 هەزار وانەبێژ هەن؛ 11 هەزاریان لە پارێزگای هەولێر، 10 هەزار لە پارێزگاکانی سلێمانی و هەڵەبجە و 12 هەزاریش لە سنووری پارێزگای دهۆکن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ