رووداو دیجیتاڵ
کەشناسی دەڵێت، سبەی نمەباران دەبارێت، بەفربارین بەردەوام دەبێت و لەکاتەکانی بەیانی زوویشدا ئەگەری دروستبوونی تەم لە هەندێک ناوچە هەیە. شارەزایەکی کەشناسی دەڵێت، دوای 15ـی ئەم مانگە شەپۆلێکی بارانبارینی بەهێز هەرێمی کوردستان دەگرێتەوە.
رۆژی دووشەممە، 05-02-2024، بەشی کەشناسی سەر بە وەزارەتی گواستنەوە و گەیاندن بڵاویکردەوە، ئاسمان لە زۆربەی ناوچەکانی هەرێمی کوردستان هەوری باراناوی دەبێت؛ لە کاتەکانی دوایی نیوەڕۆیشدا نمەباران لە زۆربەی ناوچەکانی هەرێمی کوردستان و بەفر لە ناوچە شاخاوییە بەرزەکان دەبارێت.
بە گوێرەی پێشبینییەکانی کەشناسی، ئەمڕۆ بەراورد بە دوێنی، پلەی گەرما نزیکەی 1 بۆ 2 پلەی سیلیزی نزمتر دەبێت.
لەبارەی کەشوهەوای سبەی سێشەممە، کەشناسی دەڵێت، "پێشبینی دەکرێت ئاسمان هەور بێت و لەناوچەکانی رۆژهەڵاتی هەرێمی کوردستان و پارێزگای سلێمانی نمەباران ببارێت و بەفریش لە ناوچە شاخاوییە سنوورییەکانی هەرێمی کوردستان بەردەوام دەبێت؛ لەکاتەکانی بەیانیی زوودا ئەگەری دروستبوونی تەم لەناوچەکانی بادینان و پارێزگای دهۆک هەیە."
کەشناسی دەشڵێت، بەپێی پێشبینییەکان، سبەی سێشەممە لە سنووری بادینان پلەی گەرما 2 بۆ 3 پلە بەراورد بە ئەمڕۆ بەرزتر دەبێت و لە ناوچەکانی دیکەی هەرێمی کوردستانیش نزیک دەبێتەوە لە تۆمارەکانی ئەمڕۆ.
محەممەد کەمال، شارەزای کەشناسی بە رووداوی گوت، بە گوێرەی پێشبینییەکان، "کەشوهەوا تاوەکو سبەی سێشەممە ناسەقامگیر دەبێت و دواتر تاوەکو نێوەڕاستی مانگ جێگیر دەبێت. دوای 15ـی مانگ، شەپۆلێکی بارانبارینی بەخوڕ هەرێمی کوردستان دەگرێتەوە."
بەرزترین پلەی گەرمای پێشبینیکراو بە پلەی سیلیزی بۆ سبەی سێشەممە بەمشێوەیە دەبێت:
هەولێر: 10 پلەی سیلیزی
سلێمانی: 8 پلەی سیلیزی
دهۆک؛ 10 پلەی سیلیزی
کەرکووک: 13 پلەی سیلیزی
هەڵەبجە: 8 پلەی سیلیزی
زاخۆ: 9 پلەی سیلیزی
سۆران: 5 پلەی سیلیزی
حاجی ئۆمەران: -2 پلەی سیلیزی
گەرمیان: 12 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ