هەپەگە کوژرانی سێ سەرباز و تورکیا گیانلەدەستدانی 11 گەریلای راگەیاند

 

 

لە راگەیێندراوێکدا کە رۆژی پێنجشەممە 3-10-2024 لەلایەن هەپەگە بڵاوکراوەتەوە، ئاماژە بەوە کراوە، کە رۆژی 2-10-2024 لە ناوچەی 'بەرگریی گردی ئامێدی' گورزیان لە هێزێکی سوپای تورکیا وەشاندووە و لە ئاکامدا لانی کەم سێ سەرباز کوژراون.

 

هەپەگە هەروەها رایگەیاندووە، کاژێر 3ی دوای نیوەڕۆی 30-9-2024 درۆنێکی سوپای تورکیا لە ناوچەی چەمانکێ لێیدرا و خرایە خوارەوە. هەروەها ئۆتۆمبێلێکی سەربازییش کرایە ئامانج و تێکشکێندرا.

 

لە بەشێکی دیکەی راگەیێندراوەکەدا هاتووە، کاژێر 11:20ی رۆژی 30-9-2024 لە ناوچەی زاپ گەریلاکانی پارتی کرێکارانی کوردستان (پەکەکە) ئەو ئامێر و شۆفڵانەیان کردە ئامانج، کە رێگەیان دروست دەکرد و بەهۆیەوە کارکردن وەستێندرا.

 

ئەمە لەکاتێکدایە رۆژی 1-10-2024 وەزارەتی بەرگریی تورکیا لە ئێکس گیانلەدەستدانی 11 گەریلای پەکەکەی لە هەرێمی کوردستان (ئەو ناوچەیەی بە چنگ-قوفڵ ناوی دەبات) راگەیاند.

 

ئەم شەڕ و پێکدادانە لە چوارچێوەی ئۆپەراسیۆنێکدایە، کە تورکیا ناوی ناوە چنگ-قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکردووە.