وەزیری بازرگانیی هەرێمی کوردستان: بۆ کردنەوەی سایلۆکان چاوەڕوانی دیاریکردنی بڕی گەنمین

 

کەمال موسلیم، وەزیری بازرگانیی هەرێمی کوردستان لە بووڵتەنی کاژێر 12:00ـی تۆڕی میدیایی رووداودا کە سەنگەر عەبدولڕەحمان پێشکێشی دەکات گوتی: "چاوەڕوانی وەزارەتی کشتوکاڵ دەکەین بۆ دیاریکردنی بڕی گەنمی وەرگیراوی جووتیاران، تاوەکو بڕی گەنمەکە دیاری نەکرێت ناتوانین سایلۆکان بکەینەوە، چونکە بەپێی ئەو بڕەی ئەوان دیاری دەکەن پارەی بۆ تەرخان دەکرێت."

 

لەبارەی چارەسەرکردنی گرفتی ئەو گەنمەی لە جووتیاران دەمێنێتەوە و وەرناگیرێت، وەزیری بازرگانیی هەرێمی کوردستان گوتی: "لە ئەنجوومەنی وەزیرانی هەرێمی کوردستان گفتوگۆی ئەوە کراوە، رێگەچارەیەکی گونجاو بۆ چارەسەرکردنی گرفتی گەنمی جووتیاران بدۆزرێتەوە، بۆ بە بازاڕکردنی ئەو گەنمەی دەمێنێتەوە، بتوانین بە نرخێکی گونجاو بە بازاڕی بکەین."

 

کەمال موسلیم، باسی لە گرفتی بارهەڵگرەکان کرد و دەڵێت: "گرفتی ئاڵوگۆڕی بازرگانی لە نێوان شارەکانی هەرێمی کوردستان پەیوەندی بە رێگەوبانەکان و ناڕەزایەتی دانیشتووانی سەر ئەو رێگایانەوە هەبوو، لە ئەنجوومەنی وەزیران گفتوگۆی ئەو بابەتە کرا بۆ ئەوەی رێگەیەکی گونجاو بدۆزرێتەوە بۆ ئەو بارهەڵگرانە."

 

کەمال موسلیم گوتیشی: "هەر بازرگانێک لە بازگەکان گرفتی بۆ دروست دەکرێت دەتوانێت سەردانی لایەنی پەیوەندیدار و وەزارەتی بازرگانی بکات، بۆ ئەوەی هەوڵبدەین گرفتەکانیان چارەسەر بکرین، نابێت کێشەی لەو شێوەیە هەبێت."