رووداو دیجیتاڵ
لە باکووری کوردستان و تورکیا 4.99 ملیۆن خێزان مووچەی کۆمەڵایەتی وەردەگرن، ئەم ژمارەیە بەراورد بە چوار ساڵی رابردوو 52٪ زیادیکردووە.
لە ساڵانی رابردوودا ژمارەی ئەو خێزانانەی لە تورکیا و باکووری کوردستان دەستبەری کۆمەڵایەتی وەردەگرن لە زیادبووندان. لە ساڵی 2017دا 3.2 ملیۆن خێزان لە وەرگرتنی دەستەبەری کۆمەڵایەتی سوودمەند بوون. ئەم ژمارەیە لە ساڵی 2023ـدا بۆ 4.99 ملیۆن خێزان زیادیکردووە. ژمارەی ئەو خێزانانەی دەستبەری کۆمەڵایەتی وەردەگرن لە ماوەی چوار ساڵی رابردوودا یەک ملیۆن و 700 هەزار خێزان زیادیکردووە.
بەگوێرەی داتا فەرمییەکان، لە هەر پێنج خێزان لە باکووری کوردستان و تورکیا، یەک خێزان دەستبەری کۆمەڵایەتی وەردەگرن. لە کاتێکدا رێژەی ئەو خێزانانەی دەستەبەری کۆمەڵایەتی وەردەگرن لە ساڵی 2017ـدا 13.7٪ بووە، ئەم رێژەیە لە ساڵی 20232ـدا بۆ 18.4٪ بەرزبووەتەوە.
داتا فەرمییەکان دەریدەخەن، بەهۆی کاریگەرییەکانی پەتاى کۆڤید-19 و "مۆدێلى ئابوورى نوێ" کە دواى ئەوە جێبەجێ کرا، کێشەی دارایی و هەژاری لەو وڵاتە لە زیادبووندایە.
لە ساڵی 2017ـدا 3.2 ملیۆن خێزان لە دەستەبەری کۆمەڵایەتی سوودمەند بوون. لە ساڵی 2019ـدا پێش بڵاوبوونەوەی کۆڤید-19، ئەم ژمارەیە 3.28 ملیۆن بووە. بەو هاوکاریانەی کە بە تایبەتی بۆ ماوەی پەتاکە پێشکەش کران، ژمارەی ئەو خێزانانەی لە ساڵانی 2020 و2021 دەستەبەری کۆمەڵایەتییان وەرگرتووە بۆ ئاستێکی پێوانەیی بەرزبووەتەوە.
لە ساڵی 2021 ئەم ژمارەیە بۆ چوار ملیۆن و 33 هەزار خێزان زیادیکردووە. لە کاتێکدا 4.42 ملیۆن خێزان لە ساڵی 2022ـدا سوودمەند بوون لە دەستەبەری کۆمەڵایەتی، ئەم ژمارەیە لە ساڵی 2023ـدا گەیشتە نزیکەی پێنج ملیۆن خێزان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ