وردەکاریی شەڕەتەقەکەی شاری دایک لە سلێمانی؛ 'تەقەکان بۆ کوشتن بوون'

 

هاوڕێ مەلا ستار، پەرلەمانتاری فراکسیۆنی یەکێتی لە پەرلەمانی کوردستان بە رووداوی گوت، "واگومان دەکەم ئەو کۆمپانیایەی تەقەی کردووە یەکێک بێت لەو کۆمپانیایەی کە لەماوەی رابردوودا لە بەدواداچوونەکانمان ناومان هێناون و باسمان کردووە کە خەریکی داگیرکاری و دزی و جەردەیین، دەسەڵاتیان لە پەرلەمان زیاترە، تەقەکانیش بۆ کوشتن بووە، چونکە هەموو فیشەکەکان بە جامی سەیارەکە کەوتوون لە لای سایەق و سەکنەوە چونەتە ژوورەوە."

 

لە گرتەیەکی ڤیدیۆییدا کە دوێنێ شەممە تۆمارکراوە، چەند کەسێکی دەمامکدار لە یەکێک لە هۆتێلەکانی سلێمانی دەردەکەون، گرووپی کۆمپانیاکانی ساوس کوردستان دەڵێن، ئەو ئەندامەی پەرلەمانی کوردستان چەکداری ناردووەتە سەر شوێنی کار و حەوانەوەی بەڕێوەبەری جێبەجێکاری کۆمپانیاکە و هەڕەشەیان لێکردوون.

 

هۆکاری هەڕەشەکردن بەگوتەی سامان حاجی فایەق، بۆ ئەوە دەگەڕێتەوە کە ئەندامەکەی پەرلەمانی کوردستان دانیشتووی پڕۆژەیەکی نیشتەجێبوونی کۆمپانیاکەی ئەوە، داوایکردووە دوو دەفتەر دۆلار داشکاندنی بۆ بکرێت، بەڵام ئەوان رازی نەبوون.

 

دەزگای ئاسایشی هەرێمی کوردستان لە راگەیێندراوێکدا ئاماژەی بەوە داوە کە هەردوولایەنی تەقەکەریان دەستگیرکردووە و دڵنیاییان داوە کە هەرکەس دەستی لە شەڕەکە هەبووبێت، دەیدەنە دادگە. 

 

هاوڕێ مەلا ستار بە رووداوی گوت، چەکدارەکان وایانزانیوە ئەو لەگەڵ پاسەوانەکانیدایە و تەقەیان لێکردوون. گوتیشی، "چاوەڕوانی لایەنی پەیوەندیدار و هێزە ئەمنییەکان دەکەین کە هەستاون بە ئەرکی خۆیان بۆ و دەستگیرکردنی ئەو تەقەکەرانە، ئەگەر ئەوان نەیانتوانی بیکەن ئەو کات ئێمەیش دەستەوەستان ناوەستین و شتی دیکە هەیە بیکەین."

 

بە گوتەی هاوڕێ مەلا ستار، پاسەوانەکانی بێئاگا بوون و لەناکاو 10 کەس تەقەیان لێکردوون. لە بەرامبەریشدا لایەنی دیکەی شەڕەکە دەڵێن، کێشەکە بۆ چەند رۆژێک پێشتر دەگەڕێتەوە و ئەندامەکەی پەرلەمانی کوردستان هەڕەشەی لێکردوون.