نرخی ئەمپێرێک کارەبای موەلیدە لە دهۆک دەگاتە 19 هەزار دینار

 

هەکار هرووری، بەرپرسی لیژنەی موەلیدە ئەهلییەکانی دهۆک ئەمڕۆ (شەممە) بە تۆڕی میدیایی رووداوی گوت، "مانگی رابردوو موەلیدەکان نزیکەی 460 کاژێر کاریان کردووە، بەمەش نرخی یەک ئەمپێر کارەبایان لەنێوان 18 هەزار و 500 دینار بۆ 19 هەزار دینار دەبێت."

 

تاوەکو ئەمڕۆ لە زۆرینەی شارەکانی دیکەی هەرێمی کوردستان نرخی ئەمپێری موەلیدە بۆ مانگی شوبات رانەگەیێندراوە.

 

نرخی ئەمپێری کارەبای موەلیدە بۆ مانگی کانوونی دووەمی ئەمساڵ لە هەولێر، لەنێوان 12 هەزار بۆ 21 هەزار و 500 دینار؛ لە سلێمانی له‌نێوان 13 هەزار و 500 دینار بۆ 22 هەزار و 250 دینار؛ لە دهۆک لەنێوان 19 هەزار بۆ 21 هەزار و 500 دینار و لە هەڵەبجەش لەنێوان 14 هەزار و 500 دینار بۆ 15 هەزار و 500 دینار بوو.

 

بەگوێرەی رووپێوییەکی دەستەی ئامار، ساڵی 2021 لە هەرێمی کوردستان زیاتر لە حەوت هەزار موەلیدەی ئەهلی هەبوون و کارەبایان داوەتە زیاتر لە ملیۆنێک و 311 هەزار هاوبەش، کە زۆرترینیان لە سلێمانی و کەمترینیش لە دهۆک بوون.