رووداو دیجیتاڵ
سەربازانی سوپای تورکیا هەڵیانکوتایە سەر ماڵێک لە گوندێكی سەر بە پارێزگای وان لە باکووری کوردستان. لە ئۆپەراسیۆنەکەدا دوو کەس گیانیان لەدەستدا و دوو گوندنشینیش دەستبەسەر کران.
بەگوێرەی سەرچاوە خۆجێییەکانی هەواڵ، پاشنیوەڕۆی رۆژی پێنجشەممە 31-08-2023 سەربازانی سوپای تورکیا هەڵیانکوتایە سەر ماڵێک لە گوندی چامیلی سەر بە شارۆچکەی قەلقەلی لە پارێزگای وان.
سەربازەکان گوندەکەیان گەمارۆ داوە و بۆ ماوەی دوو کاژێر و نیو ئۆپەراسیۆنەکە بەردەوام بووە.
لە کاتی ئۆپەراسیۆنەکەدا سەربازەکان بە چەکی قورس تەقەیان لە ماڵێک کردووە کە دوو کەسی تێدا بووە و بەو هۆیەوە دوو کەسەکە گیانیان لەدەستداوە.
تەرمی دوو کەسەکە لەژێر داروپەردوو دەرهێندراون، بەڵام نازانرێت ئەو دوو کەسە کێن و تەرمەکانیان بۆ کوێ بردراوە.
لە چوارچێوەی ئۆپەراسیۆنەکەدا گوندنشینێک بە ناوی "عومەر کڵچچەکەن" و "سامی کڵچچەکەن"ی لەلایەن سەربازەکانەوە دەستبەسەر کراون و براونەتە فەرماندەیی جەندرمەی قەلقەلی.
دوای رووداوەکە شاندێك، کە پێکهاتبوو لە گوڵجان کاچماز، سینان چیفتیورەک، مەحموود دیندار و زولکوف ئوچار پەرلەمانتارانی پارتی چەپی سەوز - یەسەپە لە بازنەی وان، ژمارەیەک لە ئەندامانی پارتی دیموکراتی گەلان - هەدەپە، بارۆی وان، لقی وانی کۆمەڵەی پارێزەرانی ئازادی، لقی وانی کۆمەڵەی مافی مرۆڤ، بۆ چوونە شوێنی رووداوەکە بەڕێکەوتوون، بەڵام سەربازەکان رێگەیان پێنەداون بچنە ناو گوندەکە، بۆیە بە ناچاری گەڕاونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ