رووداو دیجیتاڵ
بەرپرسی لیژنەی موەلیدە ئەهلییەکانی هەولێر رایگەیاند، نرخی ئەمپێرێک کارەبای موەلیدە بۆ مانگی کانوونی یەکەمی 2023 بە گوێرەی کاژێرەکانی کارکردنی موەلیدەکان لە نێوان 12 هەزار دینار بۆ 22 هەزار و 500 دینار دەبێت.
رۆژی دووشەممە، 01-01-2024، قارەمان مەولوود، بەرپرسی لیژنەی موەلیدە ئەهلییەکانی هەولێر بە تۆڕی میدیایی رووداوی گوت: "موەلیدەکان لە مانگی کانوونی یەکەمی 2023 رۆژانە ئەوانەی بە خشتە کاریان کردووە 12 کاژێر و نیو کارەبایان بە هاونیشتمانیان داوە و نرخی هەر ئەمپێرێک لە نێوان 12 هەزار بۆ 17 هەزار دینار بووە، بەڵام ئەو گەڕەکانەی داوای کارەبای 24 کاژێرییان کردووە، نرخی هەر ئەمپێرێک لە نێوان 21,500 بۆ 22,500 دینار بووە."
مانگی تشرینی دووەمی 2023 بەرزترین نرخ لە پارێزگای هەولێر دیاریکرا. ئەو گەڕەکانەی لەسەر داوای خۆیان لە 06:30ـی بەیانییەوە تاوەکو 01:00ـی شەو بێ بڕان کارەبایان هەبووە، نرخەکەی لەنێوان 14 هەزار و 500 دینار بۆ 15 هەزار بووە؛ ئەو گەڕەکانەشی لەسەر داواکاری خۆیان 24 کاتژمێر کارەبایان پێدراوە، نرخی یەک ئەمپێر کارەبایان تاوەکو 18 هەزار و 500 دینار بوو.
لەبارەی زیادبوونی نرخی کارەبای 24 کاژێری لە 18 هەزار و 500 بۆ نزیکەی 22 هەزار و 500، قارەمان مەولوود دەڵێت: "ئەو زیادبوونە بەهۆی زیادبوونی کاژێرەکانی کارەبا بووە، مانگی کانوونی یەکەم کاژێرەکانی کارەبا زیاتر بووە، بۆیە نرخی کارەبای موەلیدە زیادی کردووە."
بڕیارە سبەی سێشەممە نرخی کارەبای موەلیدە لە هەریەک لە پارێزگاکانی سلێمانی، هەڵەبجە و دهۆک دیاریبکرێت.
بەگوێرەی رووپێوییەکی دەستەی ئامار، ساڵی 2021 لە هەرێمی کوردستان زیاتر لە حەوت هەزار موەلیدەی ئەهلی هەبوونە و کارەبایان داوەتە زیاتر لە ملیۆنێک و 311 هەزار هاوبەش، کە زۆرترینیان لە سلێمانی و کەمترینیش لە دهۆک بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ