ئامادەکاری بۆ نمایشی "رۆمیۆ و جولیێت"
رووداو دیجیتاڵ
جارێکی دیکە گرووپێک لە هونەرمەندانی کورد دەیانەوێت سەکۆی شانۆکانی سلێمانی بەکارێکی نوێی هونەر بگەشێننەوە. ژمارەیەک شانۆکاری سلێمانی بڕیارە لە چەند رۆژی داهاتوو بینەرانی شانۆ بە شانۆگەریی "رۆمیۆ و جولیێت" لە دەرهێنانی د. فازڵ جاف، شانۆکاری کورد ئاشنا بکەن.
هونەر حەسەن، ئەکتەری شانۆیی، لەبارەی بەرهەمە شانۆییەکە بە رووداوی راگەیاند: "کاری باشمان لەسەر شانۆگەرییەکە کردووە، لە دووهەفتەی داهاتوو کات و شوێنەکەی ئاشکرا دەکەین".
ئەکتەرانی شانۆگەرییەکە 25 کەسن، زۆربەیان مامۆستا و وخوێندکاری پەیمانگەی هونەرەجوانەکانی سلێمانین، دەقەکەی شانۆنامەیەکی ولیەم شەکسپیرە کە لە ئینگلیزییەوە وەرگێڕدراوەتە سەر زمانی کوردی و بۆ بینەری شانۆیی نمایشی دەکەن.
هێرۆ سەباح، یاریدەدەری بەڕێوەبەری بەرهەمەکەیە و بە رووداوی راگەیاند: "زیاتر لە دوو مانگە سەرقاڵی خۆئامادەکردنین بۆ شانۆگەریی "رۆمیۆ و جولیێت" لە نووسینی شەکسپیر و دەرهێنانی د.فازل جافە".
شانۆگەرییەکە وەك پەیامی هونەری، رووی دەم لە گەنجان دەکات و جەخت لە سەر گرنگیی خۆشەویستی و پابەندبوون بە بەها بەرزەکانی ژیان دەکاتەوە، بۆ ژمارەیەک لە ئەکتەری گەنج، یەکەم ئەزموونی نواندنیانە.
لەرێ ئاوات، ئەکتەری بەشداربوو لە شانۆگەرییەکە، گوتی: "ئەکتەری بەئەزموون و باش تێیدا بەشدارن، ئێمە وەکو یەکەم ئەزموون وەکو خوێندکار و مامۆستا بەشداریمان تێیدا کردووە".
بڕیارە دوای نمایشکردنی شانۆگەرییەکە لە 15ـی تەمموزی 2024 لە سلێمانی، لە شارەکانی دیکەی باشووری کوردستان نمایش بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ