ئابووری
دیمەنێکی کۆبوونەوەکە کە بەسەرپەرشتیی فوئاد حوسێن کرا، وێنەکە لەلایەن وەزارەتی دارایی و ئابوورییەوە بڵاوکراوەتەوە
رووداو دیجیتاڵ
شاندى دانوستاندنکارى حکومەتى هەرێمى کوردستان و حکومەتى فیدراڵى عێراق کۆبوونەوە و، ئاستەنگەکانی بەردەم شایستەى دارایی و مووچەى دوو مانگى فەرمانبەرانى هەرێمى کوردستانیان تاوتوێ کرد.
شەوی 30ـی ئابى 2023 خەلیل دۆسکى، ئەندامى لیژنەى دارایی پەرلەمانى عێراق بە تۆڕى میدیایی رووداوى راگەیاند؛ کۆبوونەوەى شاندى حکومەتى هەرێمى کوردستان و شاندى حکومەتى فیدراڵى عێراق بە سەرۆکایەتیى فوئاد حوسێن، وەزیرى دەرەوە کرا، ناکۆکى سەرەکى لەسەر ئەوەیە، بەغدا داواى 100%ـی داهاتى نانەوتی و 50%ـی داهاتى خاڵە سنوورییەکان دەکات، بەڵام هەرێمى کوردستان دەیەوێت 50%ـی هەردوو جۆرە داهاتەکە رادەستى بەغدا بکات.
بەگوێرەى راگەیێندراوێکى وەزارەتى دارایی و ئابووریى هەرێمى کوردستان، کۆبوونەوەکە ئێوارەی ئەمڕۆ (چوارشەممە، 30-8-2023) دەستیپێکردووە بۆ تاوتوێکردنی مووچەى هەردوو مانگى تەمموز و ئابى فەرمانبەرانى هەرێمى کوردستان و ئاستەنگەکانى بەردەم جێبەجێکردنى یاساى بودجەى گشتی و، ئەو گرفتانەی لەبەردەم ناردنیدا دروست بوون.
بودجەى گشتیی عێراق زیاتر لە 199 تریلیۆن دینارە، زیاتر لە 16 تریلیۆنى پشکى هەرێمى کوردستانە.
خەلیل دۆسکى رایگەیاند یەکێک لە کێشەکانى دیکە پەیوەندارە بە نەوتەوە، لەکاتێکدا حکومەتى فیدراڵى عێراق تێچووى بەرهەمهێنانى نەوتى هەرێمى کوردستانى بۆ یەک بەرمیل بە پێنج بۆ شەش دۆلار دیاریکردووە، حەقدەستى کۆمپانیاکان زیاتر لە 28 دۆلارە بۆ یەک بەرمیل.
بەگوێرەى یاسای بودجەى گشتیى 2023، دەبێت وەزارەتى دارایی عێراق شایستەى دارایی کۆمپانیاکانى هەرێمى کوردستان بدات، بەڵام بەو پێوەرانەى وەزارەتى نەوت پەیڕەوی دەکات لەگەڵ کۆمپانیاکانى نەوت، کە بڕەکەى 10 دۆلارە بە بەرهەمهێنان و گواستنەوە.
ئەندامەکەى لیژنەى دارایی پەرلەمانى عێراق دەڵێت، یەکێک لە کێشەکانى دیکە ئەوەیە، بەغدا فرۆشى چوار مانگى یەکەمى نەوتى هەرێمى کوردستانى لەسەر پشکى هەرێمى کوردستان هەژمار کردووە بە نرخى نەوتى فرۆشراوى کۆمپانیاى بەبازاڕکردنى نەوتى عێراق (سۆمۆ) کە زیاترە لە نرخى ئەو نەوتەى هەرێمى کوردستان فرۆشتویەتى.
لەسەرەتاى ئەمساڵەوە، بەغدا دوو تریلیۆن و 598 ملیار دینارى وەک پشکى هەرێمى کوردستان رەوانە کردووە، کە بڕیارە لەگەڵ شایستەى دارایی هەرێمى کوردستان لەسەر بەغدا، پاکتاو بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ