Salih Nemir / Wêne û Vîdeo: Rûdaw
Almanya (Rûdaw) - Salih Nemir xelkê Derika Rojavayê Kurdistanê ye û li Almanyayê peykersaziyê dike.
Salih Nemir li Kurdistanê dest bi karê hunerî kiriye û vêga li Almanyayê berhemên wî yên bêhempa bala Almanan kişandiye ser xwe.
Salih Nemir wiha behsa jiyana û karên xwe yên hunerî xwe kir:
“Navê min Salih Nemir e û xelkê gundekî koçeran ê li Dêrika Rojavayê Kurdistanê me.
Min sala 1995an li Şamê Enstîtuya Hunerên Bedew kuta kir.
Ji destpêka qonaxa xwendina enstîtuyê ve, di qonaxên 1 û 2yan de min dest bi fêrbûna peykersaziyê kir û ez baş fêr bûm.
Ez ji sala 2014an ve li Almanyayê dijîm û li vir jî dîsa karê peykersaziyê dikim û em li vir kursên hînbûna peykersaziyê vedikin û xelk dixwaze fêr bibe.
“Girîng e çawa tu karibî bi kevirekî re tevbigerî”
Pêşî girîng e çawa tu karibî bi kevirekî re tevbigerî û wekî tu pê re biaxivî û bikî tiştê tu dixwazî.
Ji 2016an ve karê peykersaziyê li vir dikim û vêga projeyeke min heye û bêtirî salekê ye li ser dixebitim û ew jî ew e ku li herêma me ya koçerî hinek şahî û dîlan hene ku xebînet vêga nemane û winda bûne.
“Çand nola keleheke mezin e”
Dixwazim bi rêya projeya xwe wan şahî û dîlanan bi rêya taşînê arşîv bikim.
Girîng e ku xelk û hikûmet zanibin ku çand nola keleheke mezin e ku em karibin xwe di nav de biparêzin û ew çand bimîne.”
Florian Tully jî peykersazekî jîr, jêhatî û şareza ye. Wî wiha behsa hevnasîna xwe û Salih Nemir kir:
“Rojekê ez hatim cihê kar xwe. Du zilamên Sûriyeyî li wir rawestiyabûn û yekî got ez li kar digerim û min jî got li cem min ti kar ji bo te tune.
Paşê telefona min lê ket û jinekê got ku ew ne li kar digere lê li cihekî ku kirê bike û lê bixebite digere û bi vî awayî min hevalê xwe Salih Nemir nas kir.
Ez bi karê xwe hostayê keviran im û Salih her tim ji min re dibêje, ‘Tu masterê min î’ û ez jê re dibêjim ‘Erê, lê tu profesorê min î.’”
“11 hunermendên Kurd beşdar in”
Salih Nemir ji Swêdê bi rêya Skypeyê beşdarî bernameya Diyasporayê bû û behsa çalakiyeke kir ku îro dest pê dike:
“Festîval û çalakiyeke hunerî ye, li bajarê Malmoyê yê li başûrê Swêdê tê sazkirin û heta 18ê vê mehê didome û beşa Kurdî beşdarî çalakiyê dibe.
11 hunermendên Kurd beşdar in, 8 zilam û 3 jin û em dê di nava 4-5 rojan de karên xwe yên hunerî nîşan bidin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse