Ebdulletîf Bin Raşid El Zayanî û Nêçîrvan Barzanî / Wêne: Rûdaw
Hewlêr (Rûdaw) – Serokê Herêma Kurdistanê li Munîhê bi Wezîrê Karên Derve yê Behreynê Ebdulletîf Bin Raşid El Zayanî re civiya.
Konferansa Ewlehiyê ya Munîhê (MSC) îro dest pê kir û Serokê Herêma Kurdistanê jî yek ji beşdaran e.
Nêçîrvan Barzanî di çarçoveya konferansê de bi Wezîrê Karên Derve yê Behreynê Ebdulletîf Bin Raşid El Zayanî re rûnişt.
Serokatiya Herêma Kurdistanê li ser civînê daxuyaniyek belav kir.
Serokatiya Herêma Kurdistanê da zanîn ku her du aliyan têkiliyên Behreynê yên bi Îraq û Herêma Kurdistanê re nirxandin.
Her wiha qala pêşhatên dawî yên li herêmê û xurtkirina hevkariya dualî hat kirin.
Nêçîrvan Barzanî tekezî li ser girîngiya berfirehkirina hevkariya di navbera Herêma Kurdistanê û Behreynê ya di warên siyasî û aborî de kir.
Wezîrê Karên Derve yê Behreynê Ebdulletîf Bin Raşid El Zayanî daxwaza welatê xwe ya ji bo xurtkirina têkiliyan bi Îraq û Herêma Kurdistanê re anî ziman û pesnê rola Herêma Kurdistanê ya di parastina ewlehî û aramiya herêmê de da.
Her wiha her du aliyan li ser rewşa Sûriyeyê û çend mijarên din ên girêdayî berjewendiyên hevbeş bîr û rayên xwe parve kirin.
Konferansa Ewlehiyê ya Munîhê
Konferansa Ewlehiyê ya Munîhê (MSC) îsal cara 61ê di navbera 14-16ê Sibatê de tê lidarxistin.
Di rojeva konferansê de “plana aştiyê ya Donald Trump a ji bo Ukraynayê” û “rewşa Rojhilata Navîn” dê cih bigirin.
Konferansa Ewlehiyê ya Munîhê (MSC) dê di warê ewlehî û siyaseta derve de bibe mazûvana nîqaşên girîng ên cîhanî.
MSC yek ji konferansên herî girîng ên ewlehiyê yên cîhanê ye û cara ewil sala 1963yan hatibû lidarxistin.
Her sal bi sedan rêberên girîng ên cîhanê beşdarî vê konferansê dibin û pirsgirêk û gef û metirsiyên ewlehiyê yên cîhanî dinirxînin.
Konferans di nêzîkkirina perspektîvên cuda û zêdekirina baweriya di navbera welatan de roleke girîng dilîze.
Serokê Herêma Kurdistanê Nêçîrvan Barzanî li Munîhê bi Wezîrê Karên Derve yê Behreynê Ebdulletîf Bin Raşid El Zayanî re civiya#MSC2025 pic.twitter.com/IXZtiDFizn
— RudawKurdi (@RudawKurdi) February 14, 2025
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse