Hewlêr (Rûdaw) - Wezareta Karên Derve ya Amerîkayê ragihand ku ew bi hemû awayî piştevaniya bicihkirina Peymana Şingalê dikin.
Herwiha wezaretê diyar kir ku ew hikûmetên Îraq û Herêma Kurdistanê jî teşwîq dikin ku gavên pêwîst ji bo çareserkirina pirsa vegera penaberan a Şingalê û dabînkirina pêdiviyên wan bavêjin.
Berdevkekî Wezarata Karên Derve ya Amerîkayê li ser rewşa niha ya Şingalê û pirsa Kurdên Êzidî ji Rûdawê re axivî û got:
“10emîn salvegera Komkujiya Êzdiyan e, îsal bîranîneke pir girîng e ji bo peydakirina pêwîstiyên civaka Êzidî.”
Peymana Şingalê 2020îan di navbera Hikûmeta Îraqê û Hikûmeta Herêma Kurdistanê de hatibû îmzekirin lê heta niha nehatiye bicihkirin.
Ew berdevkê Wezarata Karên Derve ya Amerîkayê li ser Peymana Şingalê jî wiha axivî:
“Amerîka hikûmetên Îraq û Herêma Kurdistanê teşwîq dike ku gavên pêwîst ji bo bicihkirina Peymana Şingalê bavêjin û qonaxa veguhêz a darizandin û berpirsyariya tawanên navneteweyî yên DAIŞIê bi pêş ve bibin.”
Li aliyê din Berdevkê Wezareta Karên Derve ya Amerîkayê ragihand ku di serdana xwe ya Bexda û Hewlêrê de Cîgira Wezîrê Karên Derve yê Amerîkayê Uzra Zia piştevaniya welatê xwe ji bo bicihkirina tam a Peymana Şingalê ligel hikûmetên Îraq û Kurdistanê dubare kiriye.
Wî herwiha got, Amerîka hikûmetên Îraq û Herêma Kurdistanê teşwîq dike ku ji bo çareserkirina pêdiviyên wan, di nav de bi rêya projeyên jinûveavakirin û bipêşxistina warê Şingalê rasterast bi civakên etnîkî û olî bişêwirin.
Herwiha divê ew pirsgirêkên ewlehiyê werin çareserkirin û çareseriyeke demdirêj û derfeteke ewle, bi dilxwazî û bi rûmet ji bo vegera Êzidiyan bibînin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse