Hewlêr (Rûdaw) - Recep Tayyîp Erdogan ragihand ku ew dê bigihêjin armanca xwe ya “Tirkiyeya bêteror” û got, “Em ji her wextî zêdetir nêzîk in.”
Serokkomarê Tirkiyeyê Recep Tayyîp Erdogan li Koşka Serokkomariya Tirkiyeyê di bernameya fitarê ya bi polîs, cenderme, hêzên ewlehiya perevan û cerdevanan re de axivî.
Erdogan diyar kir ku wan bi operasonên li Îraq û Sûriyeyê “hêmanên terorê“ ji sînorên xwe dûr xistine û anî ziman:
“Me hemû mayîn û astengiyên li pêşiya armanca xwe ya Tirkiyeya bêteror paqij kirin.
Em dê bigihêjin armanca xwe ya Tirkiyeya bêteror.
Armanca me ew e li navxwe û derve avhewayeke mayînde ya ewlehiyê ava bikin ku tiliya ti zarok û hêzeke me yê ewlehiyê xwîn jê neyê.”
Recep Tayyîp Erdogan ragihand ku ew ne li pey hesabên şexsî ne û tenê siberoja miletê xwe difikirin û da zanîn:
“Armanca me ew e sedsala Tirkiyeyê li herêmê bikin sedsala aştî û biratiyê.”
Serokkomarê Tirkiyeyê ragihand, pêwîst e ew di pêvajoyê de bi hestyarî tevbigerin û got:
“Eger em careke din rê bidin lîstika ku berî sed salî hatiye lîstin, nifşên nû me efû nakin.
Em dê dest bidin destê hev û rê nedin ku Siyonîst li herêma me emeliyatên nû pêk bînin.
Dema me belaya terorê ya li pêşiya biratiya xwe rakir em dê zêdetir derfeta ber bipêşveçûnê bibînin.
Em dê ware ewlehiyê de jî qet tavîzan nadin. Kî xwe di ser yasayan re bibîne em dê li gel hemûyan têbikoşin.”
“Wekî neviyên Sultan Alparslan û Selaheddîn Eyûbî em dê dest bidin destê hev”
Serokkomarê Tirkiyeyê Recep Tayyîp Erdogan her wiha anî ziman:
“Îro em ji bo pêkanîna armanca Tirkiyeya bêteror bi hemû aliyên wê ve bihêztir, bibiryartir û avantajtir in.
Em ji her wextî zêdetir nêzîk in ku bi awayekî mayînde ji belayeke ku ev 40 sal in xwîn, can û çavkaniyên miletê me dimije rizgar bibin.
Siyasetmedarekî ku li beramberî miletê xwe bi hesta berpirsyariyê tevdigere nabe ku pişta xwe bide derfetekî wiha.
Em bi wê yekê berpirsyar in ku vê avantaja xwe ji bo bidestxistina encameke herî baş a di xêra temamiya 85 milyon welatiyan de bi kar bînin.
Dixwazim ligel we, miletê me yê ezîz jî vê yekê baş bizane ku em bi ti awayî ne li pey hesabên şexsî ne.
Em tenê siberoja miletê xwe difikirin. Armanca me ew e, em tişta herî rast û baş ji bo Tirkiyeyê bikin.
Armanca me ew e ku li navxwe û derve avhewayeke mayînde yê ewlehiyê ava bikin ku tiliya ti zarok û hêzeke me ya ewlehiyê xwîn jê neyê.
Armanca me ew e em sedsala Tirkiyeyê li herêma me bikin sedsala aştî, biratî û hevgirtinê.
Her kesê ku eqlê xwe nekiriye dîlê hêrsa xwe vê rastiyê gelekî baş dibîne.
Di serdemeke wiha de ku cîhan û herêma me di pêvajoyeke dîrokî ya jinûve avabûnê re derbas dibe wekî Tirkiye divê em gelekî baldar bin.
Di rojên wiha de ku şebekeya qirkirinê bi nexşeyên nû niyetên xwe yên dabeşkirina herêma me nîşan didin, divê em jî polîtîkayên xwe li gorî vê yekê bikin.
Eger em rê bidin ew lîstika ku beriya sed salî hatiye kirin, ne bav û bapîrên me, ne jî nifşên me yên nû me efû nakin.
Bi îzna Xwedê wekî neviyên Sultan Alparslan û Selaheddîn Eyûbî em dê dest bidin destê hev û rê nedin ku Siyonîst li herêma me emeliyatên nû pêk bînin.
Bi sûd dibînim ku vê rastiyê jî bibêjim dema me dîwarê terorê yê ku di navbera biratiya me ya hezar salî de hatiye avakirin hilweşand, Înşallah em dê di demokrasî, azadî, aramî û geşedana herêmî de derfeta bipêşveçûna bileztir bi dest bixin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse