Hewlêr (Rûdaw) - Cîgirê Serokê Partiya Gel a Komarî (CHP) di konferansekê de li ser ewlehiya hilbijartinan ragihand ku li seranserê Tirkiye û Bakurê Kurdistanê 200 hezar dengderên biyanî hene ku xelkê welatên Sûriye, Efxanistan, Iraq, Îran û Lîbyayê ne.
Di demekê de ku kêmî 7 mehan ji hilbijartinên giştî yên Hezîrana 2023ê re mane, partiyên siyasî yên Tirkiyê ji bo wergirtina beşek ji tedbîrên pêşwext di wan hilbijartinan de dest bi civîn û konferansan kirine.
Partiya Gel a Komarî ku li parlamentoyê duyem partiya herî mezin a Tirkiyê ye, duh 4ê Mijdara 2022ê li bajarê Îzmîrê yê Tirkiyê konferansek bi navê “Ewlehiya Hilbijartinên Giştî yên 2023ê û Girîngiya Wê” saz kir û tê de li ser hinek tedbîrên derbarê ewlehiya hilbijartinê de gotûbêj hatin kirin.
Beşek ji parlamenterên CHP û cîgirê serokê CHPê Onursal Adiguzel û hejmarek endam û alîgirên wê partiyê beşdarî konferansê bûn.
Cîgirê Serokê CHP Onursal Adiguzel di konferansê de gotarek pêşkêş kir û bal kişand ser ewlehî û girîngiya hilbijartinên 2023ê û got: “Em dikevin hilbijartineke gelek girîng. Yek ji hestyariyên herî girîng jî ewlehiya hilbijartinan e. Di sala 2017ê de travmayeke girîng hebû; meseleya dengên bê mohr, 4 deng ketin sindoqê 3 ji wan hatin qebulkirin, lê yek ji wan nehat qebulkirin. Ev yek ji nehiquqiyên Desteya Bilind a Hilbijartinan (YSK) bû.”
Adiguzel amaje bi hejmara koçberên biyanî yên li Tirkiyê û ew koçberên mafê wan ê dengdanê di hilbijartinan de heye jî da û got: Di lîsteyên dengeran de derdora 140 hezar Sûrî, 20 hezar Efxanî û jewqas jî Iraqî hene. Derdora 4 hezar jî Lîbyayî bi giştî di lîsteyên navxwe û derveyî welat de 200 hezar dengderên ji Sûriyê, Efxansitan, Iraq, Îran û Lîbyayê hene. Ev ew hejmar e li gor lîsteya ku me dawî wergirtiye. Em dê di demek nêzîk de jî lêkolînan li ser van lîsteyan bikin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse