Hewlêr (Rûdaw) - Endamê Şandeya Îmraliyê ya DEM Partiyê û Wekîlê Serokê Parlamentoya Tirkiyeyê Sirri Sureyya Onder ragihand ku ew hêvî dikin di sê heman de ji bo "pêvajoya aştiyê" her tişt hatibe sererastkirin.
Rêberê PKKyê Abdullah Ocalan 27ê Sibatê xwestibû ku PKK fesix bike û çekan deyne.
Li aliyê Komîteya Birêvebir a PKKyê jî 1ê Adarê li ser banga Ocalan daxuyaniyek belav kir û ragihand ku ew dê pêbendî banga Ocalan bibin û li gorî pêwîstiyên wê tevbigerin.
PKKyê her wiha ragihand ku ew amade ne ji bo xwefesixkirinê kongreya xwe jî saz bikin lê divê Ocalan bi rê ve bibe.
Piştî van bipêşketinan niha çav li wê yekê ne ka dê PKK çawa çekên xwe deyne û dê hikûmet li beramberî vê yekê çi pêngavan biavêje.
Endamê Şandeya Îmraliyê ya DEM Partiyê û Wekîlê Serokê Parlamentoya Tirkiyeyê Sirri Sureyya Onder doh derbarê pêvajoyê de axivî.
"Rayedarên siyasî û dewletê dê civînan saz bikin"
Onder ragihand ku ew dê di qonaxa ji niha û şûn de wekî yekem pêngav bi beşdariya rayedarên dewletê û siyasiyan hinek civînan saz bikin û got, "Em hêvî dikin di 3 mehan de her tişt hatibe sererastkirin."
"Ji Qendîlê re vîdeo hat şandin"
Li ser pirsa "Gelo banga Ocalan wekî video ji Qendîlê re hat şandin?" Onder got: "Li Îmraliyê video hat tomarkirin lê jibo Qendîlê hat şandin an na ez nizanim."
"PKK dê çawa çek deyne?"
Sirri Sureyya Onder li ser pirseke derbarê qonaxa çekdanîna PKKyê û çawaniya wê de jî got:
"Ez ji bo wan tiştan naxwazim ji niha ve ti tiştekî bibêjim. Ya girîng ew îrade û pêdagiriya ku hatiye nîşandan e. Ya mayî jî bi her awayî tê sererastkirin.”
Endamê Şandeya Îmraliyê ya DEM Partiyê Onder her wiha got:
"Eger em wekî Tirkiye ji dil û bi cidîyet rojeva xwe bixin rewşeke baş dê pêngavên demokratîk ên ku bikarin navçe û cîhanê biguherin jî li pey hev bên."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse